¹ Nigligkat si Hisus diyo to Kapirnaum, hoy nighondiyo to lugal no sakup to Hudiya, hoy niglapas kandin to woyig to Hurdan. Mohon-in mando ka mo otow diyot kandin hoy inpanuluan din to naanaran din no himu. ² Duon mo Parisiyu no nighondiyo, namangngo kandan to igkasayjop din oyjow duon igkanangon dan moyitongod kandin. Koy naan nanginso kandan ki Hisus, “Intugot naan buwa to kasulatan no og-ongkoran din ka asawa rin? ³ Nigtabak kandan ni Hisus to sagboka no panginso, “Nokoy a manaan ka sugo ni Moysis kaniyu? ⁴ Nigtabak kandan, “Nigtugot si Moysis no oghimu to balaod ka mo lukos to pog-ongkod pogkatapus to soini og-ongkoran din on ka asawa rin.” ⁵ Nigkagi si Hisus kandan, “Hoo man su kono kow man ogpaminog, insulat ni Moysis soini no balaod oyjow ogkataga kow. ⁶ Di ligkat to poghimu to ingod, 'inhimu kandan to Diyus no lukos hoy malitan.' ⁷ Iyan sikan kabunsuran no og-ongkoran to lukos ka amoy hoy inoy din hoy ogdumo on to asawa din. ⁸ Hoy kandan no daruwa nohimu sagboka konad kandan no daruwa, ko kono sagboka naan do. ⁹ Koy naan ka kono ogkabaloy no ogpog-ongkoron to otow ka in sagboka to Diyus." ¹⁰ To pog-uma dan diyo to baloy nanginso mando ka mo tinoonan to pog-ongkod. ¹¹ Nigkagi si Hisus kandan, “Ko og-ongkod ka buho to asawa din hoy og-asawa to loin, maka-panlibog mando kandin. ¹² Hoy ko og-ongkod ka lukos to asawa din, hoy og-asawa to loin, maka-panlinog man do kandin." ¹³ Duon mo otow no nigpaalap ki Hisus to mo bato oyjow ogpagon-gonan kandin oyjow ogkapanalanginan kandan. Di nig-ogotan kandan to mo tinounan ni Hisus. ¹⁴ To pogkita ni Hisus to sikan nabolu kandin hoy nigkagi kandin dutu mo tinounan din, “Hagtongi now ka mo bato no ogdani dini to koddi, kono ogpasakop to poghari to Dios no anat to pogsakop to soini mo bato, kono iyan ogkaapil to poghari to Diyus. ¹⁵ Ogkagihan ku kaniyu to malohot: ko kono niyu ogdawaton ka Poghari to Magbabayja iling to pogdawat to mo bato, kono kow iyan ogpakaapil dutu.” ¹⁶ Tapus, insapipi rin on ka mo bato hoy intol-oban din on kandan to bolad din no inpanalanginan. ¹⁷ To duon no oghipanow on si Hisus, duon otow no nigpalagoy no ogdani kandin hoy niglood hoy nanginso, “Maroyjow no talagpanulu, nukaa man oghimuwon ku oyjow ogkaabin ku ka kinabuwin waro katapusan? ¹⁸ Nigtabak si Hisus kandin, “Maniyo to nigkagi ka to maroyjow a? Waro agad hontow no maroyjow ko kono iyan do ka Diyus. ¹⁹ Ko iyan ka panginso no, nataga kad on to inkagi to kasulatan; ‘Kono ka himatoy, kono ka panlibog, kono ka panakow, kono nu himua no tutuu ka maroot, kono ka pangubat, tawro nu ka amoy hoy inoy nu.” ²⁰ Nigtabak kandan ki Hisus, “Talagpanulu, soini tibo intuman ku puun pad to pogkabato ko.” ²¹ Nigpitow ni Hisus kandin no duon pog-ulog hoy nignangonan, “Duon pad sagboka no kulang koykow, uli kad hoy ibaligya nud ka mo kalaglagan nu, hoy ka halin igtalad no diyo to mo mokohohoy-u to anat to soin no ogkaratu ka diyot langit, pogtampus libod ka hoy duma ka koddi.” ²² Natalong aman ka otow to pogdinog din to soini hoy nig-ongkod su dakol man ka kalagkalagan din. ²³ To nokoongkod on ka otow, nigpitow si Hisus dutu to mo tinounan din hoy nigkagi, “Malogon ka datu no ogmakasulod diyo to langit.” ²⁴ No noinu-inu amana ka mo tinounan to inkagi din. Koy naan ka nigparayjon kandin no nigkagi, “Mo anak, malogon amana ka pogpasakop to poghari to Diyus! ²⁵ Masayjon pad ka pogsulod to kamil to lungag to dagum, kono to datu no ogsulod diyo to langit." ²⁶ No noinu-inu amana kandan hoy nig-ikagi, “Ko iyan sikan, hontow naan do ka ogkaluwas?" ²⁷ Nigpitow kandan si Hisus hoy nigkagi, “Kono iyan ogkahimu soin to otow, di waro kono ogkohimu to Diyus. Su ka tibo nohimu din." ²⁸ Nigkagi si Pidru kandin, “Nig-ongkoran noy o ka tibo oyjow ogduma koykow." ²⁹ Nigkagi si Hisus kandan, “To tutuu ogkagiyan ku kaniyu, waro otow no og-ongkod to baloy din, mo sulud, inoy, amoy, mo anak, hoy mo tano, oyjow ogduma koddi hoy to Maroyjow no Lalag, ³⁰ no kono ogpakakuwo hoy mohon-in pad ka balos to soin no aldow; mo baloy, mo kasuloran, mo inoy, mo anak, mo tano, hoy to duma pad ka mo poglogpad. Hoy to og-uma pad no mo aldow no ogmakakuwo to kinabuwin warog tamanan. ³¹ Mohon-in ka mo bantogan di to katapusan no mokohohoy-u hoy mohon-in kuntoon ka mokohohoy-u, di to katapusan ogkahimu no bantugan." ³² To poghondiyo pad kandan to Hirusalim, nighun-a si Hisus kandan. Ka mo tinounan din nigmangasakit ka goynawa hoy ka duma no nigduma kandin nanahaldok. Hoy intapid din ka sampulu hoy daruwa no tinounan din, hoy innangonan din kandan ko nokoy ka ogkahitabo kandin kandan, nigkagi kandin kandan, ³³ “Paminog kow! Pohondiyo ki to Hirusalim, di koddi no anaka to otow igbalagad a diyo to mo agalon to mo pari hoy ka talagpanulu to sugu, oghukuman a hoy oghimatayjan. Hoy igbalagad a to mo otow no kono no mo Hudiyu. ³⁴ Susumpaliton a, hoy og-iroban, lamposan, hoy oghimatayjan di tapos to tatolu no aldow ogbatonon a.” ³⁵ Nigdani kandin si Huwan hoy Santiyagu no anak ni Sibidiyu hoy nigkagi, “Talagpanulu, duon porom ighanyo noy koykow.” ³⁶ Nigtabak si Hisus kandan, “Nokaa man ka ighanyo now koddi?” ³⁷ Nigkagi kandan, “Ko oghari kad diyo to langit, papinnouwa koy duon to dani nu; ka sagboka diyo to kalintuo nu woy ka sagboka diyo to gibang nu.” ³⁸ Di nigkagi si Hisus kandan, “Waro kow mataga ko nokoy ka inpamoyjo now. Kaantos now naan ka kasakit no og-antoson ku? Hoy ogkakaya now naan ka kalisod no ogbayjaan ku.” ³⁹ Nigtabak kandan, “Hoo, ogkahimu noy.” Nigkagi si Hisus kandan, “Tutuu, ka agowanta now ka kalisod no ogbayjaan now ku. ⁴⁰ Di kono no koddi ka og-alam ko hontow ka ogpinnuu kayi to kawanan ku hoy gibang.” ⁴¹ To pogdinog dutu to sampulu no tinounan dutu to hanyo dan, nabolu kandan ki Santiyagu woy ki Huwan. ⁴² Koy naan nig-umow kandan ni Hisus hoy ninangonan, “Natagahan now no ka agalon to soin no ingod doon goom to pogmandu to mo sakup dan hoy kandan ka ogboboot, ko nokaa ka oghimuwon kandan. ⁴³ Di kono niyu himuwa soin. Su hontow kaniyu ka ogkaliyag no ogkahimu no goomanon, kinahanglan no ogkahimu kandin no suguonon. ⁴⁴ Ko hontow kaniyu ka ogkaliyag no ogkahimu to pangulu. Kinahanglan no ogkahimu kandin no uripon to tibo. ⁴⁵ Agad koddi no Anak to Otow waro a nighondini to ingod oyjow og-alagaron, ko kono, oyjow og-alagad woy ogtalad to koddi no kinabuhi oyjow ogtubus to mohon-in no mo otow." ⁴⁶ Nokouma on kandan diyo to Hiriku. Hoy to duon o kandan to libuwas to soin no banwa duma to mo tinounan din hoy to mohon-in no otow, nabayjaan dan ka sagboka no butod no nigpinnuu hoy nanoyjo diyo to dapig to dalan, kandin si Bartimyu no anak ni Timyu. ⁴⁷ To pagdinog din no duon si Hisus no taga-Nasarit, nig-ulaloy kandin, “Hisus, kaponganan ni Dabid, kohoy-uwi a nu!” ⁴⁸ Nigsaparan kandin to mo otow no ogpahagtong, di nasi din pad agboti ka pog-uulaloy, “Kaponganan ni Dabid, kohoy-uwi a nu!” ⁴⁹ Nigsagdok si Hisus hoy nigkagi, “Alapa now sikandin dini to koddi.” Hoy in-umow dan ka butud, hoy nignanganon, “Koholo kad, apas kad sasindog su nig-umow ka ni Hisus.” ⁵⁰ Inbanggal din ka inkulobong din hoy nig-inagpas kandin no nigdani ki Hisus. ⁵¹ Hoy nigkagi si Hisus kandin, “Nukaa ka ogkaholoan nu no oghimowon ku koykow? Nigtabak ka butud, “Talagpanulu, kaliyag a no ogpakakita a dayjon. ⁵² Hoy nignangonan kandin ni Hisus, “Ka pogtuu nu iyan noko-uli koykow.” Duon-duon nigkita kandin hoy nig-alundog ki Hisus diyo to dalan.