¹ To pogtupang on ni Hisus puun to bubungan, susuluhi ka mo otow no migsinundul kandin. ² No duon sagboka no otow no ibungan no migparani kandin hoy migpanimbuol no migkagi, “Magbobayjo, ko ogkoupian ka, ogkabawiand a nikoykow!” ³ No insamsam kandin ni Hisus to migkahi, “Uya, igkoupii ku. Ogkoulian kad!” No saguguno no noulian sikandin. ⁴ No migkahiyan kandin ni Hisus, “Kono nu ipangguhud soin to minsan hontow. Ko kono, hondoyi ka to talagpanubad hoy papitow ka kandin, hoy panubad ka sumalo to insuhu ni Muwisis oyjow to pogpamalohot to mo otow no noulian kad on.” ⁵ Pogginguma ni Hisus diyo to Kapirnaum, duon migtomu kandin no kopitan to mo sundalu to Ruma no migpohid-u-hid-u diyo to kandin no migkagi, ⁶ “Magbobayjo, nokoyibat do ka suluguanon ku diyo to baloy ku no kon ogkawoil so lawa hoy amana sikandin mig-antus.” ⁷ No migkahiyan ni Hisus sikandin, “Oggondiya a ka ogbawi kandin.” ⁸ No migtabak ka kopitan, “Magbobayjo, kona a no olog no ogpopanumbaloy koykow diyo to baloy ku. Piru ilalag nu ro no ogkoulian iya ka suluhuanon ku. ⁹ Nakanongnong a kayi, uya su minsan doma sikoddi, duon labow koddioy no mo upisyal hoy duon doma mo sakup ku no mo sundalu. Ko ognangonan ku ka sagboka, 'Hondiyo ka,' oggondiyo iya sikandin. No omun ko ognangonan ku ka dangob, 'Hondini ka.' oggondini iya sikandin. No omun ko ognangonan ku ka uripon ku, 'Himuwa nu soin,' oggimuwon din iya sooyjo.” ¹⁰ To pogkarinog ni Hisus to ingkahi rin, noinu-inu sikandin hoy migkahi diyo to mo otow no migsinundul kandin, “Ognangonan ku sikaniyu to malogot: Waro o pad nakakita to iling kayi kadakol no pogpalintutuu to otow, minsan to mo Hudiyu! ¹¹ Ognangonan ku sikaniyu to duon masulug no otow no diyo ogpuun to igsilo hoy diyo to iglinob no oglagpu ogkoon ongki Abraham, Isaak, hoy ki Hakub diyo to Migharian to Magbobayjo. ¹² Piru ka mo Hudiyu no iyan porom ogkasakup to Poghari to Magbobayjo, iyan nasi igdogpak diyo to lihawangan no amana no durusilomi. No diyo, ogmandalawit kandan hoy ogkihot ka ngipon dan.” ¹³ No migkahiyan ni Hisus ka kopitan, “Uli kad on, ogkatuman ka impalintutuuwan nu.” No noulian on ka suluguanon to kopitan to sooyjo do no uras. ¹⁴ No migpanumbaloy si Hisus diyo ki Pidru. No dutun nakita rin ka anuhang ni Pidru no malitan no miggibat su miglusungan. ¹⁵ No miggon-gonan ni Hisus ka bolad to malitan, no duon-duon no noulian sikandin. No mig-onow sikandin hoy intanggu rin o onsi Hisus. ¹⁶ No hongkayi to ogkasagkup on, impanguyan to mo otow diyo ki Hisus ka masulu no migpanoeopan to mo busow. No impangalow rin ka mo busow pinaagi ro to lalag din hoy impamawian din ka langun no ogmandoralu. ¹⁷ Noyitabu sika oyjow ogkatuman ka ingkahi ni purupita Isayas, “Sikandin ka ogpamawi to ogmanggoramon ta hoy to mo dalu ta.” ¹⁸ To pogkakita ni Hisus no masulug ka mo otow no miglingkus kandin, migkahiyan din on ka mo binasbas din, “Oglapas ki diyo to doyipag to lanow." ¹⁹ No duon talagpanulu to Balaud to Magbobayjo no migparani diyo to kandin no migkagi, “Talagpanulu, og-ikul a koykow minsan kondoi ka oggondiyo.” ²⁰ No migtabak si Hisus kandin, “Duo oggolosan to mo laku hoy duon salag to mo manuk-manuk to aw-awangan, piru ka Anak to Otow waro mulo ogkoyimmolayan.” ²¹ No duon loin no binasbas ni Hisus no migkahi, “Agalon, og-uli o pad su oglobong o pad to amoy ku.” ²² Piru migtabak si Hisus kandin, “Ikul ka koddi! Iyan o balahad no oglobong to mo minatoy sooyjo so waro umul no waro ogtamanan.” ²³ Nataman, mig-untud o to balangoy si Hisus duma to mo binasbas din. ²⁴ To sasangan o sikandan no oglapas, saguguno no migpangalamag to makosog, no dutu, natimpaan o ka balangoy to mo bunlud. Piru nowulop mulo si Hisus. ²⁵ Sooyjo naan, impupukow o si Hisus to mo binasbas din to migkagi, “Magbobayjo, luwasa koy! Ogkalonod kid on!” ²⁶ No migkahiyan ni Hisus sikandan, “Maniya to ogkaaldok kow? Doisok ka pogsalig niyu!" No mig-onow sikandin hoy insaparan din ka kalamag hoy ka mo bunlud. No duon-duon no migmalinawon on. ²⁷ Amanan noinu-inu ka mo duma rin hoy migkagi, "Nokoy a otawa soin so minsan ka kalamag hoy mo bunlud, ogpalintutuu kandin?” ²⁸ To nakatuhun o sikandin diyo to doyipag to lanow, diyo to ingod no Gadara, duon migsinug-ung ki Hisus no daruwa no otow no misoropan to busow. Ka sooyjo no mo otow, diyo migpuun to sulung no sabalanan hoy amana sikandan no mabbulut, sikan naa, ogkaaldok on ka mo otow no ogbayjo to sooyjo no dalan. ²⁹ To pogkakita ran ki Hisus, migpanguloyji sikandan no migkahi, “Anak to Magbobayjo, kono koy nikoykow banggawa! Iyan nu naa innondini ka oglogpad kanami minsan kono pad no olog no timpu?” ³⁰ No diyo to bayow madmariyu, duon masulug no mo babuy no omanuwal. ³¹ No migpoyid-u-hid-u ka mo busow ki Hisus no migkahi, “Omun ko og-alawon koy nikoykow, duon koy ro pasoropa to mo babuy.” ³² No migkahiyan ni Hisus sikandan, “Uya, hondoyi kow o!” Purisu nanligwang o sikandan dutu to daruwa no otow hoy nanorop o diyo to mo babuy. Nataman, namallahuy o patupang ka mo babuy diyo to dalama poondiyo to lanow hoy nallonod o. ³³ No namallahuy o diyo to suwidad ka mo talagtamong to mo babuy hoy impangguhud dan o ka langun no noyitabu, hoy ka noyitabu to mo otow no migsoropan to mo busow. ³⁴ Sooyjo naan, nangondiyo to ki Hisus ka langun no otow diyo to suwidad hoy migpoyid-u-hid-u sikandan no og-awo si Hisus to ingod dan.