¹ Pogkaponga ni Hisus to niglalag to sooyjo no mo panugilunon nig-awwo on sikandin diyo to Galiliya hoy nighondiyad on to ingod no sakup to Hudiya no doypag to Huldan. ² No amana no mohon-in no mo otow no nigsinundul kandin, hoy inpamawian kandan diyo. ³ Duon nangondiyo to ki Hisus no mo Parisiyu oyjow to pog-olog-olog kandin no nig-inso, "Nigsugut naan dod to Balaod ta no ogpakig-ongkod ka lukos to asawwa rin to agad nokoy no ogpuunan?" ⁴ No nigtabak si Hisus, "Waro kow buwa nakasabut to inbasa now diyo to kasulatan no ligkat pad to an-anayjan inhimo on sikandan to Magbabayjo no lukos hoy malitan?" ⁵ No nigkagi pad mando ka Magbabayjo, 'Sikan ka ogligkatan no og-ongkoran on to lukos ka amoy hoy inoy rin hoy ogkasagboka on diyo to asawba rin. No sikandan so daruwa, ogkoyimu on sagboka. ⁶ Sikan naan konad on no daruwa sikandan, ko kono sagbuka naan do. Sikan naan kono ogkaayjon no ogpog-ongkoron to otow ka insagboka on to Magbabayjo. ⁷ Nig-inso on mando ka mo Parisiyu, "Di maniyu to nigsugu si Muwisis ogpabogayjon ka lukos diyo to asawba rin to sulat to pogpakig-ongkod, no oyjow ogpokoongkod on sikandin?" ⁸ No intabak ni Hisus sikandan, "Intugutan kow ni Muwisis no ogpakig-ongkod to mo asawwa now tongod so makogal ka mo ulo now. Di kono no iling duon ligkta pad to an-anyjan. ⁹ Ognangonan ko kaniyu hontow no agad ogpakig-ongkod to asawba rin no malitan no waro nakasalo kandin, ogpakapanlibug on sikandin ko ogbalow-balow og asawba." ¹⁰ No nigkagi ka mo binasbas din diyo kandin, "Ko iling mando duon ka ogkoula-ula to alunggun, maroyjow pad ko konad on og-asawba." ¹¹ Di nigkagiyan ni Hisus sikandan,, "Kono no tibo no otow no ogpakarawbat to soini no lalagon, ko kono sooyjo ro so mo otow no inbuligan to Magbabayjo kayi. ¹² Mohon-in ka ogligkatan no duon mo lukos no kono og-asawba. ka duma, kono og-asawba ligkat to nootow sikandan no kono iyan ogpakaanak; ka duma, kono og-asawba ligkat su nigpakapun sikandan; no ka duma, ogkaroyjawan no kono og asawba su oyjow ogkasagboka ka suman-suman dan moyitongod to poghari to Magbabayjo. Sooyjo ogpakarawbat kayi, ogparawbaton." ¹³ Nataman, duon mo bato no in-uuyan diyo to ki Hisus oyjow ogpatolooban to bolad din hoy oyjow ogpaampuan kandin. ¹⁴ Di insaparan sikandan to mo binasbas ni Hisus. Di nigkagi si Hisus, "Balagara now ro duon ka mo bato no ogparani koddi hoy kono now sikandan sapari, su nasakup to nigharian to Magbabayjo ka mo bato no iling kayi." ¹⁵ Pogkaponga ni Hisus to pogtol-ob kandan to bolad din, nig-awbo un sikandin. ¹⁶ Duon kanakan no nigparani ki Hisus hoy nig-inso, "Talagpanulu, nokoy-a ka maroyjow no oghimuwon ku oyjow ogkarawbat ko ka untung no waro ogtamanan?" ¹⁷ No nigtabak si Hisus, "Mania to nig-inso ka koddi ko nokoy ka maroyjow? Sagboka ro ka maroyjow, ka Magbabayjo do. Di ko ogkaroyjawan ka no ogpakarawbat to untung no waro ogtamanan, kinanlan no ogtumanon nu ka mo sugu to Magbabayjo." ¹⁸ Mig-inso ka kanakan, 'Hondo-i ruon?" No nigtabak si Hisus, "kono ka himatoy, kono ka panlibug, kono ka panakow, hoy kono ka pang-ikagi to ubat. ¹⁹ Tahura now ka amoy hoy inoy now, hoy goynawo-i now ka duma now iling to pog-goynawa now to pogko-otow now." ²⁰ Nigtabak ka kanakan, "Intantanuran kud sikan tibo. No nokoy naam pad ka duma no oggimuwon ko?" ²¹ No nigkagiyan ni Hisus kandin, "Umon naan ko ogkaliyagan ka iyan no libot diyo, ibologyo now ka mo kamanggaran now woy ka halin ipamogoy now diyo to ogkangaayjo-ayjo oyjow duon karawbat now diyo to langit. No ogkataman, libod ka kayi woy ikol ka koddi." ²² Di to pogkarinog dutun to kanakan, nighipanow on sikandin no natalong tongod su dakol ka kamanggaran din. ²³ Umon naan nigkagiyan ni Hisus ka mo binasbas din, "Ognangonan ku sikaniyu to malogot: Malisod to datu ka pogsolod diyo to nigharian to Magbabayjo! ²⁴ Ognangonan ku mando sikaniyu to malomu pad ka pogsolod to kamilyu diyo to lungag to dagom duon to pogsolod to datu diyo to nigharian to Magbabayjo." ²⁵ To pogkarinog to mo binasbas duon, amana sikandan nabolong-bolong hoy nig-inso, "ko iling man duon, hontow buwa naan do ka ogkaluwas?" ²⁶ No nigtongtong si Hisus diyo to kandan hoy nigkagi "Kono ogkoyimo soini to otow, di ogkoyimo to Magbabayjo ka tibo." ²⁷ No nigkagi si Pidru, "No sikanami soini, nig-ongkoran noy on ka tibo oyjow to pog-ikol koykow. Nokoy naan ka ogkakuwo noy duon?" ²⁸ Nigkagiyan kandan ni Hisus, "Ognangonan ko kaniyu to malogot: Ko ogkabalbalawban on soini so kalibutan, ogpinnu-u ka Anak to otow diyo to amana no matolos no turunu rin. No sikaniyu no nig-ikul koddi, ogpakapinnuu mando diyo to sampulu hoy daruwa (12) no turunu oyjow poghukom to sampulu hoy daruwa (12) no tiribu to Israil. ²⁹ No ka agad hontow no og-ongkod to baloy rin, mo sulod din, mo atoboy amoy hoy inoy rin, mo anak din hoy katantanaan din tongod to pog-ikol rin koddi-oy, ogpakarawbat to nanggatus (100) no lupi to sooyjo so noongkoran din, hoy ogbogayjan pad sikandin to untung no waro ogtamanan. ³⁰ Di mo-hon-in ka mabantug no konad ogmabantug, woy mo-hon-in ka kono no mabantug no ogkabantug on."