¹ No impoomow ni Hisus ka sampulu hoy daruwa no hibatoon din hoy impamogayjan din kandan to katongod to pogpanambal to tibo no mo dalo hoy ogmanggoramon to mo otow. ² Soini ka mo ngaran to sooyo so sampolo hoy darowa no apostolis: Ka-anayan si Simon no og-immoan ki Pidro hoy si Andris no solod din, ka daruwa no anak ni Sibidiyu no si Santiyago hoy si Huwan. ³ Si Pilipi woy si Bartolome, si Tomas hoy Matiyo no talagsukut to buhis, si Santiyago no anak ni Alpiyo hoy si Tadiyo, ⁴ Si Simon no ribildi hoy si Hudas Iskaryoti no mig-gawoy ki Hisus. ⁵ No impohipanow o ni Hisus ka sampolo woy darowa no hibatoon hoy inpanugontuhonana din to migkahi, "Kono kow hondiyo to kono no mo Hudiyo hoy diyo to mo lungsod to Samarya. ⁶ Ko kono, hondiyo now ka mo kabuwaran ni Israil no nokoiling o to mo karniro no nalaag. ⁷ Tagood to diyo kow, iwali now no magaan on ka poghari to Diyus. ⁸ No tamabali now ka ogmandaralo, uyaga now ka mo minatoy, tambali now ka ogmangibongon, hoy pang-alawa now ka mo busow. Nakarawat kow ligkat to Diyus to waro bayjad, aman pamogoy kow daan to waro bayjad. ⁹ Kono kow tatago to salapi no bulawan, pilata, hoy agad tago diyo to pontil niyo. ¹⁰ Wey kabil, og-ilisan now no kinabo, sandal hoy tukod. Su soojo nog himo, olog no ogbogayjan to ogkakaoon din. ¹¹ Aman ko maka-uma kow to saboka no longsod hoy ko bariyo naa, pamitow kow to otow no likos no ogtuonan now, hoy diyo kow pa ogpa taman to og-awo kow o to soojo no ingod. ¹² Ko ogsolod kow to baloy, panalangini now ka tagbaloy. ¹³ No aman ko ogdawaton kow to tagbaloy, ibilin now ka panalangin diyo to kandan. Piro ko kono, hawi-a now ka panalangin diyo to kandan. ¹⁴ Ko duon baloy hoy ka longsod no kono ogdawat kaniyo hoy kono ogpaminog kaniyo, ongkori now sikan hoy polpola now ka lipong ka alibo diyo to paa now. ¹⁵ Ognangon ku kaniyu ko untol. To aldow to poggokom sobla pad no mo hingpit ka logpad to Diyus to sika no longsod du to matig-Suduma hoy Gumura. ¹⁶ Pamminog kow! Igpo-ondiyo ku kaniyu no ogpoko-iling to mabbulut no mo singgalung. Aman koilingan no iling kow katagsob to ulod hoy iling. Kaamuk to solopati. ¹⁷ No bantoy kow to mo otow su og-alapon kow nikandan diyo to logparanan hoy ogpanlamposan kow kandan diyo to mo simbaan dan. ¹⁸ Og-alapon kow kandan diyo to tangkaan to mo gobirnador hoy diyo daan mo hari tongod kodi-oy oyjow ogpakapangguhud kow to maroyjow nangnangonon diyo to kandan woy diyo to kono mo Hudiyo. ¹⁹ Omun ko ogdakopon kow on, kono kow kaipong ko nokoy ka igkagi now woy ko ogmonuwon now to kagi, so nigpan-anad a kaniyo to Diyus ko nokoy ka ognangonon now to sika no timpu. ²⁰ Su konad on no kaniyu pad ka og-kagi, ko kono, ka panisingan o to Amoy now no Diyus ka og-kagi pinabayjo kaniyu. ²¹ Duon mo otow iyan mismo ogpoyimatoy to mo suldd dan. No duon mo Amuy no ogpoyimatoy to mo anak dan, no doon daan mo anak no ogkuntoro to mo amoy hoy inoy ran hoy ogpoyimatoy kandan. ²² Ogdumutan kow to langon no otow tongod kodi-oy. Piru sooyjo so ogpabulus og-ikul kodi-oy taman katamanan iyan ogkaluwas. ²³ Omun ko gbaybayaran kow diyo to saboka no lungsod, aput kow diyo to lain no longsod. Ognangonan ko kaniyo to untul: To kono now pad ogkalingut ka tibo no mo lungsud to Israil, oglibod on ka anak to otow. ²⁴ "Waro hibatoon no labow to kandin no talag-anad, hoy waro udipon no labow to kandin no agalon. ²⁵ Olog do iya no ogpoko-iling ka hibatoon to talag-anad din. No ka udipon, olog do iya no ogpoko-iling daan kandin to agalon din. Ko ogngaranan ma ki Meibulan i ka pangulu to saboka no pamilya, iyan naan pa iya ka mo sakop din. ²⁶ Aman kono kow kaaldok to sooyjo no mo otow. Su ko nokoy ka imbunbunan, ogkawakisan, hoy ka tibo no inholos, ogkanongnongan. ²⁷ Ko nokoy ka ingguhod ku kaniyu diyo to madusilom, ipangguhud now diyo to maawabang. No ko due narinog now no innaas-naas do, iwangal-wangal now diyo to tibo. ²⁸ Kono kow kaaldok to mo otow no ogpoko-imatoy to lawa piru kono ogpoko-imatoy to gimokod. Ko kono, iyan now ikahaldok ka Diyus no ogpakadaraat to lawa hoy gimokod diyo to linow no hapoy. ²⁹ Ka darowa no maya egkaboli ro to barato, piro waro saboka kandan no ogko-ulug diyo to tano gawas ko pogboot to Amoy now no ogko-ulug kandan. ³⁰ No kaniyu, nasool rin ma tibo agad ka mo bolbol to olo now. ³¹ Aman kono kow kahaldok, so subla kow pad no labow du to mo maya. ³² - ³³ Sikan naan, ka inggod hontow no og-angkon kodi-oy diyo to tangkaan to mo otow, og-angkonon ko daan kandin diyo to tangkaan to Amoy ko no diyo to langit. ³⁴ Kono kow suman-suman no iyan ko in-ondini ka og-alap to karoyjawan kayi to ampow to tano. Kono no iyan ku in-ondini ka og-alap to karoyjawan, ko kono, to kasamuk. ³⁵ Su iyan ku in-ondini ka ogpogkuntoro to mo anak no lukos to amoy ran, ka ogpogkuntoro to mo anak no boyi to inoy ran, hoy ka ogpokogkuntoro to mo amboy to anuhang dan no boyi. ³⁶ No iyan dod ogkakuntoro to otow ka diyo mismo to baloy rin. ³⁷ "Ka minsan hontow no og-goyinawa to amoy hoy inoy rin labow to pogoyinawa rin kodi-oy, kono no litos no ogkoyimo no hibatoon ko. No ka og-goyinawa to mo anak din labow to pog-goyinawa rin kodi-oy, kono no litos no ogkoyimu no hibatoon ku. ³⁸ Ka minsan hontow no kono ogti-ang to kandin no krus hoy og-ikol kodi-oy, kono no litos no ogkoyimo no hibatoon ko. ³⁹ Sooyjo so karoyjawan no ogluwas to kandin no untong, nasi ogkawaraan kayi, piro sooyjo so ogkawaraan to kandin no untung tongod kodi-oy, ogpakarawat to untung no waro ogtamanan. ⁴⁰ Ka agad hontow no ogdawat kaniyu, ogdawat daan kodi-oy. No ka minsan agad hontow no ogdawat kodi-oy, ogdawat daan to mig-paalap kodi-oy. ⁴¹ Ka agad hontow no ogdawat to Prupita tongod su prupita kandin, ogpakarawat to dasag iling to dasag ogkarawat to Prupita. No ka inggad hontow no ogdawat to matarong no otow tongod su matarong kandin, ogpakarawat to dasag iling to dasag no ogkarawat to matarong no otow. ⁴² Ognangonan ko kaniyo to untul: ka agad hontow no ogpoinom to agad songo buong do no mahagsil no woyig diyo to hibatoon ku agad kono no importanti tongod su hibatoon ku kandin, ogpakarawat iyan kandin to dasag.