¹ 1 Duon timpu no nigsasindog si Hisus diyo to ilis to lano to Ginisarit ka ogpanulu, hoy ogsukul-sukul on ka mo otow diyo to kandin ka ogpamminog to lalag to Magbabayjo. ² No duon daruwa no balangoy no nakita ni Hisus diyo to ilis to lanaw no nig-ongkoran to mangangalap su ogpanlulu sikandan to mo pukut dan. ³ No dutun, nig-untud on si Hisus to sagboka no balangoy no iyan kamunoy si Simun. Inhangyu din si Simun no igpatulod ka balangoy poondiyo to woyig, no nigpinpinnuu on sikan hoy nigpanulu to mo otow. ⁴ To nokoopus on sikandin ka nigpanulu, nigkagiyan din on si Simun, "Hondiyo ka to maralom hoy isawbilo now ka mo pukut now oyjow ogkoutol kow." ⁵ No nigtabak si Simun, "Talagpanulu, napawban koy igsawbilu ku ka mo pukut noy." ⁶ No nigtuman dan ka nigkagi ni Hisus hoy amana no dakol ka ngalap no nigsagad to pukut dan, hoy hapit on ogkangagisi ka mo pukut dan. ⁷ No nigkamoy ran ka mo duma ran diyo to dangob no balangoy no ogpaparniyon kandan hoy ogpabuligon. Nigparani kandan ka mo duma ran hoy inniponu dan to ngalap ka daruwa no balangoy. Sikan naan ka ogkagan-ganaran on sikandan ogkoonlod. ⁸ To pogkakita si Simun Pidru dutun, nigluwod sikandin diyo to tangkaan ni Hisus no nigkagi, "Magbabayjo, pariyuka koddioy su makasasala a no otow." ⁹ Nakagi rin sikan su nabolbolongan sikandin hoy ka mo duma rin to amana no dakol ka nootol dan. ¹⁰ Nabolong-bolong mando ka mo duma ni Simun, si Santiyagu hoy Huwan no mo asnak ni SIbidiyu. No nigkagiyan ni Hisus si Simun, "Kono ka ogkahaaldok, puun kuntoon, otow on ka oghingutulon nu." ¹¹ To nokopoilis dan on ka mo balangoy ran, nig-ongkoran dan ka tibo, hoy nig-ikul dan on ki Hisus. ¹² To diyo pad si Hisus to sagboka no suwidad, duon sagboka no otow no ibungon. To pogkakita rin ki Hisus, nig-usongol sikandin diyo to tangkaan ni Hisus no nigpohoy-u-hoy-u no nigkagi, "Magbabayjo, ko ogkaliyagan ka ogkabawian a nikoykow!" ¹³ No insamsam ni Hisus ka mo otow ka nigkagi, "Ho-o, igkaligi ku. Ogkoulian kad!" Saguguno noulian ka ibungon. ¹⁴ No nigkagiyan ni Hisus ka otow, "Kono nu ipanggugud soin to agad hontow. No hondiyo kad to talagpanubad hoy ipapitow ka kandin ko warad on dalu nu hoy panubad ka sumalo to insugu ni Muwisis oyjow to pogpalamogot to mo otow no noulian kad on." ¹⁵ Di nasi do iyan niglogob moyitongod ki Hisus. Di masulug ka mo otow no nangondiyo oyjow to pogpamminog ki Hisus hoy oyjow ogpahawbi to mo dalu ran. ¹⁶ Di layjun do ogpasagsagboka si Hisus ko oghondiyo to mammara no ingod no kono ogkoupaan, hoy ogkaampuan. ¹⁷ Sagboka no aldow nigpanulu si Hisus, duon mo Parisiyu hoy mo talagpanulu to balaud to Magbabayjo no naminnuu duton no diyo namuun to loin-loin no mo ingod no sakup to Galiliya, Hudiya hoy Hirusalim. No inbogayjan si Hisus to gohom to Magbabayjo to pogpamawbi to ogmandaralu. ¹⁸ Duon nonokouma no mo otow no nigdayjung to otow no kunad ogkawoil su lawba. Ogsolod poron sikandan to baloy oyjow ogpakasabok ka otow diyo to tangkaan ni Hisus. ¹⁹ Di waro sikandan nakasolod diyo to baloy su masulug ka mo otow. Nokoy naan ka nig-alap dan on diyo to atop hoy nigloko dan ka pipilohon no atop. Hoy nigtalunton dan ka napulid no nighibat duon to hibatanan to tangkaan ni Hisus. ²⁰ To pogpitow ni Hisus dakol ka pogpalintutuu ran, nigkagiyan din on ka kono ogkawoil so lawba, "Sulod, inpasaylu on ka mo salo nu." ²¹ No ka mo talagpanulu to Balaud to Magbabayjo hoy ka mo Parisiyu nokoinso diyo to goyinawa ran, "Hontow-a no otow soini so ogbaloy-baloy to Magbabayjo? Waro otow no ogpakapasaylu to mo salo, su ka Magbabayjo do!" ²² Di natagahan ni Hisus ka sumansuman dan no nigkagiyan din sikandan, "Mania to ogsumansuman dan kow to iling duon? ²³ Hondoi buwa ka malomu: Ka ogkagi, 'Inpasaylu on ka mo salo nu: Hoy ko ogkagi, 'Unow ka hoy hipanow kad?' ²⁴ Di igpapitow ku kaniyu no duon katongod to Anak to Otow kayi to ampow to tano to pogpasaylu to mo salo." No nigkagiyan din ka otow no kono ogkawoil ka lawba. "Onow ka, hoy alapa nu ka hibatanan nu hoy uli kad on diyo to kaniyu!" ²⁵ No saguguno nigsasindog ka otoiw diyo to tangkaan to mo otow no nigsapsapula to hibatanan din. No nig-uli on sikandin ka nigsayjo to Magbabayjo. ²⁶ Nawangalan ka tibo no otow hoy nahaldok mando sikandan, hoy nigsayjo dan ka Magbabayjo no nigkagi, "Kabolbolongan amana ka nigkita ran kuntoon." ²⁷ Pogkaponga to sikan, nighipanow on si Hisus hoy duon nigkita rin no talagsukut to buhis no ngaranan ki Libi no nigpinpinnuu diyo to upisina rin. No nigkagiyan ni Hisus sikandin, "Ikul ka kanak." ²⁸ No nigsasindog si Libi hoy nig-ongkoran din on ka tibo no nig-ikul ki Hisus. ²⁹ Pogkaponga, nigtugon si Libi to dakol diyo to baloy rin talahan ni Hisus. Duon mando masulug no mo otow no nigtugon kandan to nigkoon hoy mo talagsukut to buhis iyan ka duma kandan. ³⁰ Duon mo Parisiyu hoy mo talagpanulu too Balaud to Magbabayjop no nigbagulbul diyo to mo hibatoon ni Hisus. No nig-inso sikandin, "Mania to nigpakiglagkos kow nigkoon hoy nig-inum duon to mo talagsukut to buhis hoy to duma no mo makasasalo?" ³¹ Ni nigtabak si Hisus diyo to kandan, "Ka mo otow no waro dalu, kono ogkoilangan to talaghawbi, ko kono, iyan do ka ogmandaralu. ³² Wara a nighondini oyjow og-umow to mo matarong, ko kono, to mo makasasalo oyjow og-inniyugan dan ka mo salo dan." ³³ Duon mo otow no nigkagi diyo ki Hisus, " Ka mo hibatoon ni Huwan malasi ogpuasa hoy og-ampu, hoy iling dod man ka hibatoon to mo Parisiyu. Di ka mo hibatoon nu, nigparayjun nigkoon hoy nig-inum." ³⁴ No nigtabak si Hisus, "Ogpapuasoon now naan ka magaliyug to ogpangasawba ko duma ran pad kandin? Kono iyan! ³⁵ Ogmokouma ka timpu no og-angayjun on diyo to kandan ka ogpangasawba no ogpuaso on sikandin to sikan no aldow." ³⁶ No nigpangguguran pad man-on kandan ni Hisus to mo panampitan, "Waro otow no manggad no kumbalu, hoy kono man-on oghangkus ka manggad no igtupak diyo to tapoy no kumabalo no ogtupakan. ³⁷ No waro mando otow no ogtagu to manggad no binu diyo to tapoy no taguanan no laplap to mananap, su ko oghimuwon din sikan, ogbotu ka taguanan hoy ogkoitis on ka binu no ogkarootan on mando ka taguanan. ³⁸ Ka manggad no binu koilangan no diyo igtagu to manggad no taguanan no laplap. ³⁹ Waro otow no ogkoibog pad og-inum to manggad no binu ko nalayam on kandin to tapoy no binu, su domdom din no maroyjow pad iyan ka tapoy no binu."