¹ Aman no kamolu pad ogmandalapak ka mo linibu no mo otow no ogmamakagdidiokoy on diyo ki Hisus, pigkagiyan ni Hisus ka mo hibatoon din, "Pitow kow, su atuk ko ogkahalinan kow to batasan to soini mo Parisiyu no puli ra ogpamadiin-diin. ² Di waro holos no kono ogkamaanan to mowuri no timpu. ³ Koy naan, agad nokoy ka igkagi niyu dutu to marusilom, kamaanan du to maawang, hoy angad ka puli niyu ro ro ognaas-naas diyo to solod, no ogkarinog to tibo. ⁴ Mo sulod, kono kow ogkahaldok duon to mo otow no oghimatoy to lawa niyu, to pogkapunga to sikan waro loin no ogkinangolan diyo to iyu. ⁵ Kagiyan ku sikaniyu ko hontow ka ogkahaldokan niyu, iyan niyu kahaldoki ka Diyus, su ka pogkamatoy to otow oglogparan din mando ka gimukud. No yanan ka tahan a ogbohoy kaniyu no iyan niyu do kahaldoki ka Diyus. ⁶ Pitowa niyu ka bayjaku no doroisok iling to pinakawaro? Di waro agad sagboka kandan no nalingawan to Diyus. ⁷ Undag kow pad, anoy ra kabulbul niyu tig-insuul din ka tibo. Koy naan ka kono kow ogkahaldok! Tongod to niglabow kow pad bayjaku." ⁸ Pigkagiyan pad kandan ni Hisus, "Agad hontow no otow ka ogkagi no Magbabayjo a rin, kanak no anak to otow ogkilalahon ko naan kandin duo to tangkaan to mo diwata to Diyus. ⁹ Di agad hontow no otow ka kono og-abinon duo to mo otow, kono daan og-abinon duo to tangkaan to mo diwata to Diyus. ¹⁰ Agad hontow ka ogkagi kanak no Anak to Otow no maroot; di ka malimpig-limpig to Ispiritu Santu konad iyan ogkapasaylu. ¹¹ Ko ogpamatangko kow diyo to simbaan to mo Hudiyu dow ko diyo to Gubirnadur tongod to pogtuu niyu kanak, kona ogkatalong ko nokoy ka igtabak niyu. ¹² Su iyan on balagad ka Ispiritu ko nokoy ka angayjan no igtabak niyu to sikan no timpu." ¹³ Hoy duon otow diyo no nigkagi, "Talag-anad, kagihi nu ka mo kakoy ku no mo lukos no ogtalaran a to kabilin doy." ¹⁴ Pigkagihan kandin ni Hisus, "Ogoy to soini no otow, nokoy aman, daratuon a no ogponhusuy to mo butang niyu?" ¹⁵ Hoy pigkagiyan ni Hisus ka mo otow, "Pitow kow agad nokoy no poghanhan, su ka tutuu kona no ka mo butang ka ogmakadoyjow to pog-ugpo." ¹⁶ Hoy inkagiyan kandan ni Hisus no nangagi, "Duon otow no sapian no pig-urakan ka kamot din. ¹⁷ Koy naan ka nasuma-suman din no mig-ikagi, 'Nokoy on buwa ka oghinangon ku? Waro man ogkataguan to soini so gaani ku!' ¹⁸ Sugo pad buwa ko oggugumas kud ka bugawan ku hoy oghihinang ad to dakol no bugawan, hoy ka diyo kud igtagu ka ogkagaani hoy ka mo kalaglagan ku. ¹⁹ Koy naan su mohon-in on ka nohimu ku no igtagana ku to suno no tuig, waro igkaraas ku, puli a ro naan ogkoon hoy og-inom hoy ogkoholo-holo!" ²⁰ Piru pigkagiyan kandin to Diyus, 'Ogkalangog no otow, kuntoon no karusilumi og-awaan kud koykow to untung. Hontow naan ka ogpohimolos duo to inlimud nu no mo butang?' ²¹ Angod iya to sikan ka ogkapurulogan du to otow no oglimud to kalaglagan di mokohid-u-hid-u kandin diyo to Diyus." ²² Hoy nigkagi si Hisus to mo tinounan din, "Koy naan ka ogkagiyan ku kaniyu, kono kow ogkatalong to pogkoon niyu hoy ogkabuyi moyitongod to kabulo niyu to lawa niyu. ²³ Hoy ka kinabuwi amana pad iyan mayinungdanon su ka pogkoon hoy lawa amana padiyan mayinungdanon ko dutu igkabolo. ²⁴ Nigkagi si Hisus, "Pitawa niyu ka mo uwak. Waro kandan nigpamula, waro limuranan noy bugawan di ka Diyus nigpakoon kandan! Niglabow kow pad no duon pulus to mo bayjaku. ²⁵ Hontow kaniyu ka ogtimul to malayja niyu no kinabuwi pinaagi to igkaraas moyitongod to soin? ²⁶ Kono kow ogmakabulig agad doisok no manggad, maniyo man ogkaraas kow to duma no manggad? ²⁷ Pitawa niyu ka nigmonu to pogdakol to mo bulas diyo to gulangan: Warad kandan nabaybayjari hoy nigdakol. Di kagiyan ku kaniyu agad si Sulumun no sapian waro nigkumbalo iling to karoyjow to soini no mo bulak. ²⁸ Ko inkinabuan to Diyus ka mo sagbot kuntoon no aldow, di asolom warad ogsilaban niyu, iyan kow pad naan? Pogkadoisok to pogtuu niyu! ²⁹ Hoy kono kow ogkaraas to ogkoonon niyu hoy og-inumon. ³⁰ (Su ka mo otow no waro nigtuu to Diyus anoy'g pamango to soin.) Nataga ka Amoy niyu no nanginahanglan kow to soini no kalaglagan. ³¹ Hunaa niyu pad to oghari ka Diyus duon to kinabuwi hoy ka oglogob kandin kaniyu to soini no mo kalaglagan. ³² Kono kow kahaldok, doisok no gurupu! Su ka amoy niyu no liyag to pogbogoy kaniyu to Gingharian. ³³ Ibaligya niyu ka tibo no mo bahandi hoy ibogoy ka halin diyo top mo publi. Pamurut kow to mo puntil no kono ogkabigtow hoy limura niyu ka mo bahandi diyo to langit su diyo konad ogkaawo su waro takawon no ogpamurut hoy konad ogkutkuton to annoy. ³⁴ Hondoi ka mo bahandi niyu diyo daan ka pusung niyu. ³⁵ Pangandami niyu ka agad nokoy no oghinguma. Huguta niyu ka mo kinabo hoy tuturi niyu ka mo hapuy niyu. ³⁶ Anat to sikan uripon no nigpasagad to poglibod to agalonligkat diyo to niggagastu no nigsakat. To duon nokouma ka agalon na natuktuk, intukasan dayjun to mo gimbatuon ka sira. ³⁷ Mampo ka mo gimbatuon no ogbatukan to agalong no nigtukas hoy nig-andam! Kagiyan kus kaniyu no ogbabakos kandin, papinnuu rin kandan to koonanan hoy atimanon. ³⁸ Hoy mampo kandan ko ogmakaandam to pog-uma to karusilumi hoy balo ogkapawu! ³⁹ Timaanji niyu soini: Ko ogtagaan to tagbaloy ka kagan-u mokouma ka takawon, ogbantayjan din soikan hoy kono ogmakasolod to baloy rin. ⁴⁰ Koy naan ka bantoy kow, tongod to uras no waro niyu tatagari, kanak no Anak to Otow ogmokouma." ⁴¹ Nig-ikagi si Pidru, "Magbabayjo, hontow naan sikan no panampitan, kanami buwa no sumusunud hoy para to tibo?" ⁴² Intabak kandin ni Hisus pinaagi to loin no panampiton, "Hontow no sulugoon ka matinumanon hoy matagsob no kandin man ka og-alamon to agalon no ka ogdumala karumaan no gimbatoon? Hoy kandin ka ogbogoy to tuman no oras. ⁴³ Mampo ka gimbatoon no poglibod to agalon din ogkaumaan no nighimu to kandin no himuwunon. ⁴⁴ Su kandin ka igpadumalo to tibo no bahandi to agalon din. ⁴⁵ Di mokohimu ka mo gimbatoon no pogligkat to agalong ogkasumansuman din no malogoy pad kandin oglibod, hoy ogbunsud naan do kandin no ogpanlampos to duma rin no mo gimbatoon, ma lukos hoy maboyi, oghihinantoy kandin hoy og-inum no mokohubug. ⁴⁶ Nakauma ka agalon din to oras no waro din dahuma, no amana ka pogbayjad-bayjad no in-gupi duto to duma rin. Iparuma kandin to mo otow no kono ogkasaligan. ⁴⁷ Di ka gimbatoon no namaan ko nokoy ka ogkaliyagan to agalong din di waro nigpatuu soini, dakol bayja-bayja no ogkaguraman din. ⁴⁸ Hoy ka mo gimbatoon din waro namaan ko nokoy ka ogkaliyagan to agalon hoy nokohimu to mo himuwonon no kono no maroyjow ogpabaybayjaran daa, di doisok do. Agad hontow ka ogbogayjan to dakol, dakol daan pasasagaronlig diyo to kandin. Moon-in ka ogkapasasagad ligkat to otow no inbogayjan to moon-in. ⁴⁹ Migkagi si Hisus kandan, "Mighondini a to kalibutan hoy ogsupakon ka mo otow. Ogkoiling kandan to ogkalab-kalab no apuy. ⁵⁰ Di to kono pad soini ogkoyitabu moon-in pad ka mo pogbayjad-bayjad no ogkangalambag, hoy kono ogkayimutang hantud ogkaponga. ⁵¹ Na sumansuman niyu ba no oghondini a oyjow og-alap to karoyjow dini to kalibutan? Piru ka tutuu, nighondini a oyjow og-alap to kagubot hoy to pogbagbaad-baad. ⁵² Hoy hantod kuntoon, tongod kanak ogkabayin -bayin ka mo pamilya. Ko lalimma kandan, ka tatolu batuk to daruwa hoy ka daruwa batuk to tatolu. ⁵³ Ka amoy hoy ka anak no lukos ogmakig-usig. Ka inoy hoy ka anak no boyi ogpakig-usig, hoy ka ugang no boyi hoy mokoamboy no boyi ogmakag-usig daan." ⁵⁴ Migkagi si Hisus to mo otow, "Ko ogkakita niyu ka kibul ogkagi kow, 'Og-uran soini,' hoy ogkoyitabu iyan soin. ⁵⁵ Ko og-agbot ka kalamag ogkagi kow, 'Ogmoinit,' hoy iyan daan soin ogkoyitabu. ⁵⁶ Mo tigpoiling-iling! Kamaan kow no ogtag-an ko nokoy ka ogkayitabu pinabayjo to kaniyu no pog-aha to tano hoy to langit, di maniyo no kono kow makatag-an to mo panghitabu kuntoon? ⁵⁷ Maniyu to waro niyu sumsumana ko nokoy ka tamanan? ⁵⁸ Ko duon ogbayjung no ogsumbung koykow, panamantamani no iyan no pakighusuy ka dajun kandin to kono kow pad oghusuy to kurti. Su atuk ko ogpogoson ka rin to pog-alap diyo to huwis hoy ka huwis ko ogbogoy diyo to Pulis oyjow ogpirisuhan ka. ⁵⁹ Dow kono kad iya ogmakalibwas taman to ogkabayjaran no ka multa.