¹ To soini no panawon, nig-ampo si Hisus diyo to sagboka no banwa. To pogka ponga to’g ampo, nigkagi to kandin ka tinuonan din no sagboka. Magbabayjo panuloa koy no kykow to pog-ampo, iling ki Huwan no nigpanulo to mo tinuonan din. ² Si Hisus nigkagi kandan, ko og ampo kow, hundo-una now, ‘Amoy: Ogdayjanon ka to balaan no ngaran nu, oghari ka puron kayi to kanami. ³ Ibugoy lanami ka og kinaanglan doy to tagso no aldow no ogkoonon. ⁴ Hoy pasayloa ky to mo salo doy so nigpasaylo ky to nakasalo kanami, hoy kono koy ipabayjo to karootan.’’’ ⁵ Hoy nigkagi si Hisus to mo tinuonan din, pananglit ka sagboka kaniyo ka og hondiyo to baloy to sagboka now no alokoy to liwbaro to karusilom hoy nigkagi kandin, ‘Asang, pasambayja a to tatolo no paan. ⁶ So duon alokoy ko no sikan pa iyan nokouma no waro igpakuon ko kandan. ⁷ Hoy og tabakon ka to alokoy no diyo to libwasan, kono anod talogona! Inlokoban kod ka gumawan hoy ka mo bato nangibat on. Sikan na-an ka kona ad og poko onow yjow og bogayjan ka to ogkakuon. ⁸ Nangonan ko kaniyo no agad alokoy no kandin, kono kandin og onow hoy ogbugoy koykow to paan. Di og onow naando kandin hoy ogbugoy koykow to tibo no inkinahanglan so waro ka man nasipod no og boyjo. ⁹ Koy na-an og kagihan ko kaniyo: Pamoyjo kow oyjow ogbogayjan kow pamitow kow hoy kaniyo og pokokita; Panoktok kow hoy og tukasan ka gomawban para kaniyo. ¹⁰ So ka tibo n namoyjo ogbogayjan hoy kandin no namitow og pokokiya hoy ka gumawban ogtukasan para kaniyo no og panoktok. ¹¹ Kaniyo no mo amoy, hontow man kaniyo ka ogbugoy to ulod diy o to anak ko ogboyjo to isda? ¹² Hoy ogbugoy kandin to salipit-sipit ko ogboyjo to atulog? ¹³ Agad nokoy kow pad no makasasalo, katuo kow ogbogoy to maroyjow no mo kalaglagan diyo to mo anak now. Sobla pad to amoy ta no diyo to langit no ogbugoy to Ispiritu Santu, kandan no namoyjo kandin. ¹⁴ Sagboka no panahon to sikan no inpapaawbu ni Hisus ka bosow no amang. Hoy ka naka awbu on ka bosow, nakakagi on ka otow no amang hoy no ino-ino ka mo otow. ¹⁵ Di manalimboka kandan nigkagi, si Beelsebel no agalon to mo bosow no iyan nigbugoy kandin to gawom to pogpa awbu kandan! ¹⁶ Duon duma no nigboyjo si Hisus no ogpapitawon t ko in-inowan oyjow og poila no kandin ka inpa-alap to Diyus. ¹⁷ Di nataga si Hisus to mo sum-sumanan dan hoy nigkagi kandin, agad nokoy no mo nasod no og pokoghimatayjoy hoy ka taltaanak no og boboyen-boyen og pokoghimatayjoy hoy og mokogsuloy. ¹⁸ Koy na-an ko duon gingaharian ni Satanas duon mo pundok no nokog-ulin nogpokog-ogot, ogmonowon dan na-an on to pogpasasindog ka gingharian? Nigkagi kow no nandoldol a to mo busow tongod so inbogayjan a ni Beelsebel to gawom to poghimo to soin. ¹⁹ Ko in iling ko to pogdoldol ka mo busow, inmono manaan to mo kaap-apoan now to pogdoldol? Ka kaniyo no mo kaap-apoan nigpaila no sayjop kow! ²⁰ Ko tinuod iyan ka pogduldul ko to mo busow pinabayjo to gawom to Diyus hoy nigpaila soin no noko-uma on ka pogpangulo to Diyus diyo to kaniyo. ²¹ Ko ka sagboka no otow no manokal hoy duon mo pangariban din no og bantoy to baloy din, kono og kahilabotan ka mo kalaglagan din. ²² Di ko dun pad man manokal no otow n g sulong hoy ogpildi to sikan no otow, ka manmanokal ka og agow to tibo no pangariban no insalsaligan to sikan no otow hy og boboyen-boyenon to pinaka-manokal ka pangariban din. ²³ Ka kono ogdapig kanak, og osig kanak, hoy ka kono ogbulig kanak to poglimod, ogpogsuloy on. ²⁴ Ka panawon no og-uma to sagboka no otow ka sagboka no maroot ni ispiritu ogluog-luog kandan diyo to banwa no mammara oyjow og pamongho to og pahulayan. Ko kono kandin ogpokokita to banwa, ogkagi kandin, oglibod ad soga diyo to in-ogpaan ko. ²⁵ Sikan na-an oglibod kandin hoy ogpokokita to baloy no maroyjow hoy napalastar ka mo gamit. ²⁶ Hoy oggawbas kandin hoy og alap to loin no pito no Ispiritu no garabi ka madduot kuno kandin hoy ogsulud kandan hoy ogpu diyo. Sikan naan to kaoposan, ka koyimtang to sikan no otow koyimo no maroot kuno to nohon-a. ²⁷ To pogkagi pad ni Hisus to soini duon sagboka no malitan no nangiyak taliwbaro to mo otow no nangalimod hoy nigkagi kandin. Iyan mampu ka malitan no og kaburos hoy nigpasusu koykow. ²⁸ Di nigtabak si Hisus, iyan mampu ka otow no namonig to lagong to Diyus hoy nigtuman. ²⁹ Tagood no nangalimod ka mo otow no mohon-in nigkagi si Hisus, to pogkamakasasalo to mo otow to soin panawon! Namoyjo kandan to ilahanan di waro kandan bogayji gawas to nayitabu ki Jonas. ³⁰ Si Jonas ka sagboka no ilahanan to mo otow diyo to ninibi, ka anak da-an to otow ka nayimo no ilahanan para to mo otow to soin panawon. ³¹ To aldow to poghukom, ka rayna nigsasindog to ogkakawbanan oyjow og pan nangon to mo otow so nighipanow man kandin taliwbaro to ingod hoy ogpaminog to maralom no katuonan to hari no si Sulumun. Hoy kunton soinid ka labaw pad ki Sulumun. ³² To aldow to poghukom, ka mo otow to Ninibe ogmangipanow hoy ogpangabulo kaniyo so in ongkuran dan on man ka mo salo dan sugod no nadinog dan ka pogpanulo ni Jonas. No kuntoon kayid on ka labow pad ki Jonas! ³³ Waro nigdagkot to sulo oyjow ighulos to gantangan. Ko kono igtago soin to tagoanan no ogkakita to mo otow ko og sulod kandan. ³⁴ Ka mata no ka sulo to lawba nu. Ko maroyjow ka mata nu, makalogub ka kaawbang to tibo no lawba nu. Di ko madut ka mata no, makalugob ka karusilom to tibo no lawba. ³⁵ Nokoy na-an no bantayji now ka kaawbang duon to kaniyo kuno ogkarosilom. ³⁶ So ko ka tibo no lawba no ogkapuno to kaawbang no warad baad no karosilom, oglugob soin angod to salong no nakabat-ow koykow. ³⁷ To nakaponga on nigkagi si Hisus, duon sagboka no parisiyu no nighinggat kandin to ogkuon sikan naan ka nigduma ki Hisus hoy nigpatogtogonoy kandan. ³⁸ No ino-ino ka Parisiyu no nabantayjan din si Hisus no waro nanglulu no nigkuon. ³⁹ Tongod to sikan nigkagiyan kandin to Magbabayjo, kaniyo no mo Parisiyo niglimpiyo to libwasan to mo buong hoy pinggan di ka sulod to goyinawba no napuno to pogpanglimbong hoy to karootan. ⁴⁰ Kaniyo no og koongo-ongo! Kono ba no ka Diyus ka nighimo to libwasan no iyan nighimo to sulod? ⁴¹ Di igbugoy ka duon to mo buong hoy pinggan diyo to mo pobli oyjow og kalimpiyo ka tibo diyo to kaniyo. ⁴² Mokohihid-o kow no mo Parisiyu! Nigbugoy kow diyo to Diyus igkanapolo no boyen to mo lamas iling to herbaboyna hoy kaningaa hoy duma pad no gulay. Di waro now bogayji to katarong hoy dakol no goynawa ka Diyus. Kinahanglan og himoon on soin mo botang to waro pogbalagad to duma no mo botang. ⁴³ Mokohihid-o kow no mi Parisiyu! Kaliyag kow to maroyjow to pin-nowan sulod to Sinagoga hoy og loworan kow diyo to merkadu. ⁴⁴ Mohohihid-o kow amana! Iling kow to mo lubong no waro noilohi to otow no indiokan dan on manaan. ⁴⁵ Hoy duon sagboka no manunulo to balaud no nigkagi kandin, maistoro! To pogkagi no to sikan nasipod koy! ⁴⁶ Nigtabak si Hisus, mokohohoy-o kow no mo talag-anad to balaud! In-tiang now ka mabogat no alaponon to mo otow di kaniyo mismo waro9 niggungon to soin agad sagboka now no tudlo oyjow og bolig kandan. ⁴⁷ Mokohohoy-o kow! Nighimo kow to maroyjow no mo lobonganan to mo Purupita no inhimatayjan to mo kaap-apoan now. ⁴⁸ To soini kaniyo mismo nig-angkon hoy nigdawbat to inhimo to mo kaap-apoan now no kandan ka nighimatoy to mo Purupita hoy kaniyo ka nighimo to mo lungon dan. ⁴⁹ Tongod to soin nigkagi ka matagsob no Diyus, ‘Paalapan ko kandan to mo Purupita hoy ka mo sinugu oyjow ogpahisakitan ka duma hoy ka duma oghimatayjan. ⁵⁰ Nokoy na-an ka ogpaningilan ka mo otow to soin panawon tongod t poghimatoy dan to tibo no purupita songod pad to poghimo to ingod. ⁵¹ Ligkat to poghimatoy ki Abil hangtod to poghimatoy ki sakaryas no inhimatayjan taliwbaro t taapag hoy balaan no banwa. Oho, ogkagihan ko kankiyo oghilogparan iyan ka mo otow to soin panawon tongod to soin tibo! ⁵² To pogkamohohoy-o now no mo talagpanulu to balaud! Inhulos now ka yabi no iyan ogtukas to gumawban to katagahanan di waro kow nigsolod hoy in-olotan now ka ogsulod. ⁵³ To pog awbu ni Hisus, inlibak kandin to mo talagpanulu to balaud hy ka mo parisiyu hoy nanginso kandin mayitongod to mohon-in no mo kalaglagan. ⁵⁴ Nig-antiyan dan si Hisus to og lit-ag oyjow ogkasaponan dan no sayjop ka inkagi din.