¹ Tantanuri no soini, to katapusan no Aldow nokouma ka kalogon. ² Ka mo otow ogsumansumanon do to kougolingon dan hoy to salapi garolon kandan, mapaampawwo, sampaliton, og ato on to inoy dan, konad no mapasalamaton hoy konad no Diyusnon. ³ Waro kohoy-u dan, kono ogpohosoy, talagpanulu, patuyjang oghimu to maroot, maddomoton to maroyjow. ⁴ Talaglubus, pasagad, hoy garolon amana, igpalabi dan ka kalibutanon kono to Diyus. ⁵ Ogpabilin kandan no Rilihiyusu di og ongkoran dan ka tutuu no goom. Pariyu in soini mo otow. ⁶ Pila kandan ka ogpamonohik diyo to baloy oyjow to poglimbong to mo mokohohoy-u no mo malitan no nabogatan to salo hoy magaan do ogkaalap diyo to nigkoloin loin no koibog dan. ⁷ Nanamantaman soini no malitana no ogkatoow di kono kandan ogmakasabut to kamatuoran. ⁸ Anak ki Hanis hoy si Hambris no waro nigtuu ki Moisis, soini no otow waro nig uyjon to kamatuuran, maligson ka sumansuman dan hoy waro natuman ka ka pogtuu dan. ⁹ Di kono kandan oglampos su ogkitoon man hangkuwan to tibo ka kandan pogbinuang anat to nohitabu ki Hanis hoy si Hambris. ¹⁰ Di waro nokoholos ligkat koykow to inpanulu ku ka tuud ku to kinabuhi. Nataga ka to pogtuu ku, padiralom. Poghigugma hoy moinantoson. ¹¹ To pogpabayjad hoy mo pog antus no no-umahan ku diyo to Antiuquia, hoy kono hoy to litra di inluwas a to Magbabayjo ligkat to tibo. ¹² Ka tibo no nanamantaman no ogkinabuwi no Diyusnon diyo ki Kiristu Hisus baybayjaran mando. ¹³ Di ka mo maddoot hoy ka ogpaanat-anat nasi on ogmadoot, limbungaros to tibo ogkalimbungan mando kandan. ¹⁴ Di koykow pabilin ka duon to kamatooran no inpanulu ku koykow hoy to malogot non nigtuuwan su nataga kaman to nanulu koykow to soini. ¹⁵ Nataga kaman bunsud pad to pogkabato no nigbasa kad to kasulatan to balaan kasulatan. Soini ka nigtalad koykow to kaalam hoy na nigbul-os koykow diyo to kaluwasan pinabayjo to pogtuu diyo ki Kiristu Hisus. ¹⁶ Ka tibo no kasulatan insulat duma to layjag ligkat to Diyus hoy duon pulus oyjow to pogpanulu to kamatuuran, to pogsapad, to pogbawoy hoy to pogpanulu monuwon no ogkabuwi ki to matularong. ¹⁷ To anat, ka og alagad to Diyus oglogob hoy og andam to tibo no maroyjow no hinang.