¹ Seini, eden se maikagi no? Nayan gayed kidon meg-inang te menge sala? Amon labi pa dakel se kaido te Timanem kanitadon. ² Meneng eked yan kepakay. Eked kedon den peg-inang te sala, yan eked din heman kepakay aw meg-inang kedon pa te sala, so wedad tolos diya kenitadon. ³ Netegahan niyo din te pegpebonyag te kedita, tadon migpasakop diya ki Cristo, megsebad kedon heman te kemetayen din. ⁴ Peneakit te pegpebonyag tadon iling te megpakita te imbegay den se pedowan diya ki Cristo. Nematay kidon doma kandin, aw iling te inlebeng kidon heman doma kandin. Neinang iyan amon begayon kidon te Timanem te kaling pedowan te wedad Timanem. ⁵ So migsebad lkidon diya ki Cristo te pegkematay tadon iling kandin yan megsebad kandin heman diyan kandin te pegkeantay tadon iling te pegkeantay din. ⁶ Nelegahan tadon te piglansang ki Jesus doton te Kros, amon matay, iling te inlansang heman se pedowan tapay pedowan tadon doma kandin doton te Kros. Amon eked kedon den pekeinang te menge sala. ⁷ So aw matay sin se otaw, eked den pekeinang te sala. ⁸ Aw metay kidon doma ki Cristo, memenal kidon te binigayan kidon te pedowan wadad taman iling kandin. ⁹ Netegahan tadon den te inantay si Cristo ekat te nematay aw eked den palos sokandin toda kematay denaeg den se eneg te kemetayen. ¹⁰ Aw mekesabad ulo sikandin kamatay, tongod te menge sala te menge otaw, aw eked dan palos sikandin kematay. Nematay den sikandin siene, aw seikandin pedowan imbegay din te Timanem. ¹¹ Peneoket te pegpesakop niyo ki Cristo, aneng-aneng neyo to iling kaw den te nematay te sala, aw siini megpasakop kaw din diya ke Cristo. ¹² Yan eked den kepakay aw beya beyaan kaw te sala, eked den kepekay aw tomanen niyo se medaet ebeg te pedowan niyo, te kemetayen se mapesalowan, aw mipesakop se pedowan niyo. ¹³ Ika niyo eggamit te lawa niyo mig-inang te sala, meneng kailangan ipalowan niyo se Timanem diya kenyo. Aw benegayan kaw den to kaling pedowan, so impelowa kaw din lekat te kemetayen, aw benegayan kaw den te kaling pedowan. ¹⁴ Eked kaw den keleges meg-inang te sala, so nekelawa kaw den kena pinaoket te menge puno, meneng penaekit te kaido aw tabang te Timanem. ¹⁵ Nayan, penkey matolid kidon den, kena peneokit te menge punu, aw te Grasya te Timanem. Eked den kepakay aw meg-inang kideon te sala eked den kepakay. ¹⁶ Netegehan tadon aw megpelalalng kidon, diya te doma, kailangan tomolo kandin iling keman kenyan aw meg-inang kidon te sala aw mesakop kidon te sala, kametayen se detengan. Aw megtoman kidon te Timanem, aneng-anengen te Timanem te metolid sikandin. ¹⁷ Kedengan, nelalang kaw te menge sala, meneng onto a den megpesiopong te Timanem, so nelobos den se pedowan niyo egtolo te kebenalan intolada kaninyo. ¹⁸ So empalowa kaw den lekat te sala, kalangan te matolid denn se eg-anangen niyo. ¹⁹ Kena medalem se kagi ko kinyo seini,se ebeg ko mekelabat kaw te tolada ko kenyo. Kedengan megpesakop kaw te sala, aw ginamit niyo se lawa niyo mig-inang te sala, aw gayed niyo egdogangan se sala. Meg-inang te medaet meneng songkani, kailangan gamiten niyo se pegkeotaw niyo meg-inang te metolid aw benal kaw egpenimanem. ²⁰ Kedengan megpesakop kaw te sala, weda kaw peg-aneng -aneng, peg-inang te metolid. ²¹ Meneng wedad ontong niyo lekat te ininang niy kedengan, siyan, madaet egkeyayaan niyo den songkani? So denatengan te kemetayen wedad temanen. ²² Meneng, so empelowa kaw ten Timanem lekat te sala aw megpesakop kay den diya kandin. So doen den ontong niyo, so ininang kaw den egpenemanem. Aw yan bagayan kaw din te kaling pedowan wedad temanan. ²³ Betengan te kematayen wedad temanan se eg-inang te sala, meneng se ebowang te temanan, yan se kaling pedowan wedad temanan pinakit te pegpemenal tadow te pengelo tadon si Hesu-Cristo.