¹ Iling nga peg-ilingan te pegpetolid te Timanem te menge otaw, tentengi niyo si Abraham nga amoy tadon nga menge Judiyo. ² Kon pigtolid sikandin te Timanem tongod te kandin menge ininang , peden doen ikepesigarbo din. Meneng se benal, wedad ikepesigarbo din te Timanem. ³ Netegahan tadon ini tongod kay se kasulatan neg-ikagi, "Nemenal si Abraham te Timanem aw tongod te kandin peg-pemenal pigtolid sikandin te Timanem." ⁴ Se otaw nga negtrabaho sikandin. Sesildo eked aneng-aneng nga bowang tongod kay kandin ini pigpagodan. ⁵ Meneng pigtolid ki te Timanem tongod to kinitadon pegpemenal kandin nga negetolid te mekesasala, aw kena tongod te kinitadon menge ininang. ⁶ Yan heman ini se ebeg ipekelabut ni David te dalem minikagi sikandin nga mepalad se otaw nga pigtolid te Timanem kena tonog te kandin menge ininang. ⁷ Sikandin minikagi, " Mepalad se menge otaw sen kandan menge sala pigpasaylo aw weda den aneng-anengi te Timanem. ⁸ Mepalad se otaw sen kandan menge sala eked den belensihi te Timanem batok kandin." ⁹ Seini menge inikagi ni David kena olo alang te menge Judiyo, kon kena alang heman te menge kena Judiyo. Netegahan tadon ini tongod kay nehisgotan day den se inikagi te kasulatan nga , " Nemanal si Abraham te Timanem aw tonogd te kandin pegpemenal pigtolid sikandin te Timanem." ¹⁰ Kano lay ini kehitabo? Kena ba se pegtolid kandin nainang man te weda pa sikandin ketoli? ¹¹ Penga niyan pigtoli sikandin yan se pengelila nga pigtolid den sikandin te Timanen tongod te kandin pegpemenal te weda pa sikandin ketoli. Yan nga si Abraham neinang amay te kalahat nga wede ketoli meneng negpemenal te Timanem, aw tongod te kandan pegpemenal pigtolid dan te Timanem. ¹² Si Abraham amay heman te menge tinoli, kena tongod te kandan pegketinoli, kon kena tongod ke kandan pegpemenal nga iling te pegpemenal te kinitadon amay nga si Abraham te dalen weda pa sikandin tolii. ¹³ Kedengan,negpakang se Timanem ki Abraham aw te kandin menge bowadbowad nge se keneyonan meinang kandan inpakang ini kena tongod kay pigtolo ni Abraham se punu, kon kena tongod kay pigtolid din pineokit te kandin pegpemenal. ¹⁴ Kon se menge mesakop te punu yan olo se mekekinawa te fakang te Timanem na, wedad kekemowan se kinilado pegpemenal te Timanem, aw kawang olo se kandin pakang. ¹⁵ Se punu yan se lekatan kon nga lay doen pegpelemun lekat te Timanem. Kon wedad punu, wedad sebad nekelapang. ¹⁶ Nayan se afakang te Timanem pigbasi te pegpemenal, amon meinang bowang lekat te Timanem aw mesigoro nga mekinawa ini te kelahat menge bowad bowad ni Abraham- kena olo ke menge Judiyo nga nesakok ke punu kon kena te menge kena Judiyo nga menanal heman iling ki Abraham. Kay si Abraham yan se amay te kelahat nga negpemenal, Judiyo man o kena. ¹⁷ Neg-ikagi se kasulatan," Pig-inang ko sikona nga amoy ke kedita menge nasod." Nayan te sinelowan te Timanem sikandin se kinitadon amay. Aw se timawen nga pigpemenalan ni Abraham yan heam se Timanem nga negebegay te pedowan te menge nematay aw neg-inang te menge kedonan nga wadad kedengan. ¹⁸ Bisan wedaden onto paglaom nga meinang amay, nemenal gihapon si Abraham nga tomanen te Timanem se kandin infakang kandin nga sikandin neinang amay. Nayan tongod te kandin pegpemenal, neinal sikandin amay te kedita menge nasod, tepad onto te inikagi te Timanem kandin. ¹⁹ Te dalem neg fakang se Timanem ki Abraham, menge sebad gatos den ken omay se kandin idad, aw netegahan din nga temoay den sikandin aw imposibli den nga mekebata pa. Netegahan din heman nga se kandin esawa nga si Sara eked pekebata tongod kay baog ini. Meneng lig-on se kandin pegpemenal te Timanem. ²⁰ Weda onto sikandin pegdowadowa te infakang te Timanem, hinoon nemenal sikandin nini. Nayan piglig-on sikandin kidoen te kandin pegpemenali, aw pigduyun din sa Timanem. ²¹ Tongod kay simalig onto sikandin nga mekeinang se Timanem pegtoman te kandin infakang. ²² Nayan tongod te pegpemenal ni Abraham pig-tolid sikandin te Timanem. ²³ Sumala te nasulat te kauslatan, meneng seini kagi, pigtolid sikandin, Insolat kena olo alang ki Abraham. ²⁴ Konkena alang heman kimitadon toliden ki heman kon nemenal ki te neantay se kinitadon Timanem Jesus. ²⁵ Pig-imatay si Timanem Jesus tongod te kinitadon menge sala, aw pig-antay sikandin amon toliden ki.