¹ Kon yan kedi, basi meg-insa kaw kon doem ba pegkebintaha se kinitadon pegka Judiyo o doem ba kekemowan se kinitadon pegketinoli. ² Te pegkebenal, medita se bintaha kinitadon. Mona te belahat, imbegay kinitadon se kagi te Timanem. ³ Bisan benal nga doem menge Judiyo nga weda tolo nini eked onto keinang nga eked tomani te Timanem se inpakang diu kedeugan. ⁴ Bisan kon se kelahat mge otaw belalawen, se Timanem kasaligan heman te kandin mge kagi. Iling te inikagi te kasulatan: "Mepematod-an nga kebenalan se kamno pig-ikagi aw gayed lomowa nga benal se kamno peg-okom." ⁵ Pengeniyaa, basi doen mikagi, kon pineokit te kenami pig-inang nga medaet kitaen se kepiya te Timanem, kena metolid se Timanem kon ipelumna kay din. Siyan nga menge kagi binoang. ⁶ Eked iyan keinang! Tongod kay kon kena metolid se Timanem, menonen din man peg-okom se menge otaw dini te keneyonan? ⁷ Basi doen mikagi pa onto, "Kon pineokit te kenami pegkebolalaw komowa nga kena bolalawen se Timanem aw pineokit nini meduyuu sikandin, ngalay ipelumnu pa man kay iling nga mekesasala? ⁸ Siyan ngo pagpangatarongan negepekalabet nga mepiya se peg-inang te medaet amo medayag se mepiya. Sumala te menge otaw nga ebeg megbaet kenami yau ini se kenami pig-tolada. Seinin menge otaw angayan onto nga ipelamun te Timanem. ⁹ Basi neg-aneng-aneng kaw nga labi pa mepiya ki kay te menge kena Judiyo. Kena iyan benal! Impekita ko den nga se kelahat Judiyo man o kena, mekesasala, ¹⁰ Kay yan onto ini se pig-ikagi te Kasolatan; Wedad palos bisan sebad nga metolid. ¹¹ Wedad palos bisan sebad nga nekelabet tepad te Timanem, aw wedad palos negtingoha te pegkilala kandin. ¹² se kelahat simimang te benal nga dalan aw neinang weded polos te Timanem. Wedad pales bisan sebad nga nag-inang te mepiya. ¹³ Se kandan bekelun iling te abli ngalebeng nga maho, kay tomalag pegpanlimbong se lomowa te kandan menge baba. Kon mikagi dan, sekandan dila iling te alas te memokan. ¹⁴ Se eglowa te kandan menge baba tomalag mesakit nga menge tollou ¹⁵ Te deitek oto nga lekatan mengimatay dan dayon. ¹⁶ Bisan kenan dan doton egtanan dan te kedaet ow kelimahan. ¹⁷ Wedad dan metegahan tepad te mepiya nga peg-domaay. ¹⁸ Aw weda dan palos kelemitan te Timanem." ¹⁹ Seini, netegahan tadon nga se kelahat inikagi te punu alang kinitadonuga menge Judiyo nga negekinabohi dalem te punu. Nayan eked ki pag-ikagi nga eked ki pelumuni. Se kelahat menobag te Timanem tongod te kandan menge sala. ²⁰ Kay wedad palos otaw nga meinang metolid sinolowan te timanem pineokit te tolo te punu. Se punu imbegay te otaw amon ipekita nga sikandin mekesasala. ²¹ Meneng seini inpetaga-taga den kon menowen te Timanem pegtolid se otaw. Seini kena pineokit te pegtolo te punu. Se punu onto aw se insotot te menge propita nagepemetood kani. ²² Pig-tolid te Timanem se otaw pineokit te pegpemenal ki Jesu-Cristo, kay se Timanem wedad pinelabi. Nayan si bisan sinu nga nemenal ki Jesu Cristo toliden din. ²³ Kay se kelahat menge otaw negpekesala aw kena takos sinelowan te Timanem. ²⁴ Meneng tongod te grasya te Timanem pigtulid ki pineokit ki Cristo Jesus nga nagtobos kinitadon, aw seini gasa te Timanem kinitadon. ²⁵ Impeibing sikandin te Timanem dini te keneyonan amon idogso se kandin pedowan amon wewedad se keopal te Timanem kinitadon, aw pineokit te kandin dipanog mepasaylo ki te kinitadon menge sala kon memenal ki kandin. Pig-inang ini te Timanem te pegpekita nga sikandin metolid. Kay kedengan inpeokit din olo se kinitadon menge sala tongod kay mainantoson sikandin. Angay ki den peden nga pelumuna. ²⁶ Meneng seini indogso din den se pedowan ni Cristo amon ipekita nga sikandin metolid. Tongod kani pig-inang te Timanem kiten nga metolid sikandin bisan te pegtolid din ki bisan sinu nga nemenal ki Jesus. ²⁷ Naga wedad palos bisan sini nga mekepesigarbo kon pigtolid ki te Timanem tongod te kinitadon pegtolo te punu, mekepesigarbo ki. Meneng se benal eked ki pekesigarbo tongod kay pigtolid ki te Timanem pineokit te kinitadon pegpemenal. ²⁸ Kay nemenal ki nga pigtolid te Timanem se otaw pineokit te pegpemenal aw kena pineokit te pegtolo te punu. ²⁹ Kon kena ini benal, Timanem olo sikandin te menge Judiyo aw kena Timanem te menge Judiyo. Meneng Timanem heman sikandin te menge kena Judiyo. ³⁰ Kay doen sebad olo ko Timanem. Aw tolidenan din se menge kena Judiyo kon nemenal dan heman ki Jesu. ³¹ Seini weda negkehologan nga tinenowan tadon se punu.Pigtolo tadon beling se kandin katoyoan.