¹ Eden man, tinayog ba te Timanem sen kandin pinamalli nge menge otaw? Wedad gayed, kay siak heman sebad ka Israelinhon, bowad-bowad i Abraham, aw mesakop te pongan i Benjamin. ² Weda tinayag se Timanem te menge otaw nge kandin pinamalli lekat pa gabii, neaneng-anengan niyo ba sen inikagi te solat tepad ki Ilias? Kana ba megmeklamo sikandin te Timanem tepad te ininang te Israel? Minikagi sikandin. ³ "Timanem, nengimatay dan sen kamno menge propeta, aw migabet den heman sen kamno menge halaman solomon te ipagpemegay day diya kamno. Siak den olo sen netamanan nge egpenimba diya kamno aw ibig dan pateimatayan adan. ⁴ Mening eden ba sen leba te Timanem diya kandin? Doen a pa netenanan nge pito melalan ke menge Israelinhon nge weda pegsimba te imahen i Baal. ⁵ iling heman iyan kwani kanitadon songkani, doen metananan pa nge menge Israelinhon nge egpemenal te Timanem, doen pinamili din sikandin tepad te kandin grasya. ⁶ Sen penamalli kiden din kana tepad te kan den iningngan ko nana sumala te grasya te Timanem, kay aw pineokit te ininangan te otaw kana iyan netawal nge grasya. ⁷ Kwani, mekeikagi kidon nge sen menge Israelinhon weda keabet se pengandoy dan nge meinang metolid. Sen penamalli olo te Timanem yan sen mekeabat kani, meneng sen doma impategel sen kandan mga olo. ⁸ Yan iyan sen inikagi te solat tepad diya kandan, "Illing dan te impetadogi te Timanem, aw lamig songkani weda dan kataga-tega te insakto aw weda pekelabet te kebenalan." ⁹ Se David eg-ikagi neman tepad diya kandan, "Hinaut nge sen kandan menge halad meinang litag aw mekedogso nge mekapalag-lag diyan kanden. ¹⁰ Hinaut nge maibotaon dan aw hinaot nge eked mebeget din mge ginalokdo amon mabongkog dan tanda te kelimahan hangtod songkani. ¹¹ Sen menge Judio mekedogpo kay weda dan pemenal ki Cristo. Indan megnenu himan kwani? Nagakahulugan ba nge sen kandan pegkedagdag lamig duen te kana! Meneng tepad te kandan peglapas nebegayan dan te higayon sen menge kana Judiyo nge mekalowa, aw tepad seini punga sen menge Judio. ¹² Seini, sen peghupas aw sen kalidoan te menge Judio nengibeg te medita nge kepiyaan doton te menge otaw te tibook keneyonan, onto pa gayed aw mesikop den sen kedekelan te menge Judio nge nemenal kandin. ¹³ Kwani, eg-ikagi a kanyo nge menge kena Judio. Ininang a te Timanem nge apostol para kenyo amon itolada ko kenyo sen tepad diya ki Cristo. ¹⁴ Pengkey pa maokit ini menga kenyo sen kanak menge doma Judio anon sen doma dan memenal heman aw mekelowa. ¹⁵ Kay aw sen pegtinayog te Timanem te menge Judio nge sen doma nge menge otaw te kanayonan nekepadepag te Timanem, inda eden pa lebo sen meinang kon seng menge Judio dawaten toda te Timanem. Mesakop dan te menge nematay aw toda dan heman nge neantay. ¹⁶ Sen pesalowan te menge Judio illing heman kan: Kon sen sebad lapid se pan inebegay doton te Timanem, sen kadita nge pan kandin heman sen Timanem, aw sen delul te kayo Timanem se tig-apo sen penga te menge kayo kandin heman. ¹⁷ Sen menge Judio iling te menge penga te kayo nge Olibo nge pinenupo, aw sikiyo menge kana Judio iling te menge penga te ihalas nge olibo nge pigsogpat te pigtepuan nge menge penga. Nayan nekesingit kaw te menge kepiyaan nge imbegay te Timanem te menge Judio. ¹⁸ Meneng ika niyo eg-aneng-aneng nge lebaw mepiya kenyo labi pa menge penga nge pigtepo. Aneng-anengi niyo nge sikenyo menge olo, kana niyo sen eg-antay te delid, aw kena sen delid yan sen eg-antay kenyo. ¹⁹ Pengkey sen doma kenyo mikagi, "Ngalay pigtepo dan aw sikanami sen pigsogpetan aw kena sikanami lubi pa mepiya kagi kandan? ²⁰ Tinepo dan tepad kay weda dan pemenal ki Cristo aw kenyo sen pigsogpetan tepad key nemenal kaw. Nayan ika niyo egpelangkaw-langkaw, peg-aha kaw baling. ²¹ Tepad kay tinapo man gani te Timanem sen benal nge menge penga nge yan sen menge Judio, labi pa menyas sen pegtepa kenyo, kay sinogpetn kaw olo sikenyo menge pangu. ²² Dini niyo kita sen kepiya te Timanem aw sen kandin medaet nge batasan, istrikto sikandin te menge otaw nge kana egpemenal te kandin, meneng mepiya sikandin kenyo, aw megpetanen kaw kidoen te kandin grasya. Meneng aw eked, tepoen kaw din heman toda. ²³ Te laing bahin, aw eked dan pegpategel sen menge Judio aw memenal dan heman tada, isogpat kaw din liko te lawa te kayo; Meinang iyan te timanem. ²⁴ Kay sikenyo nge menge kana Judio iling kaw te menge penga te ihalas nge Olibo nge pigtepo aw pigsogpat te kana ihalas nge olibo nga yan sen menge Judio, pengkey pa aw seini sukwahi te kanitadon neanadan nge pemeokit meneng labing sayon para te Timanem nge iliko isagpat sen benal nge mengepenga doton te kandan piglekatan nge lawa te kayo. ²⁵ Menge kedowa ko diya ki Cristo, ibeg ko nge metagahan niyo sen kebenalan nge weda pa ketagahi te menge otaw, amon eked kaw pegpelangkaw-langkaw nge iling kaw heman gayed te siini. Metugul se menge Judio (lumalabay lang) aw singed seini olo se higayon nge makompleto dan sen keditaan te menge kena Judio nge memenal kandin. ²⁶ Penga niyan ipelowa sen menge Israelinhon, iling te kagi te solat, "Lekat te ogpaanan iningadanan Sion egpelowa, ebaten din se kadita te menge bowad-bowa i Jacob lekat te kededatan. ²⁷ Aw yan siini se kanak pakange doton kandan, se pegwedaden ko se sala ininang dan." ²⁸ tepad kay miselikway te menge Judio sen mepiya indan, neinang kaw kebolaw te Timanem amon sikenyo menge kana Judio mebegayan kaw te higayon nge mekelowa. Meneng kay penamalli dan te Timanem, dakel se pedowan te Timanen diya kanami. Migpeselig sikandin kani gabii te kandan menge kemonaan nge pelanggaen din sen kandan menge bowad-bowad. ²⁹ Aw eked gayed katoda heman sen aneng-aneng te Timanem tepad kidoen te menge otaw nge kandin pinemelli aw inpanalanginan. ³⁰ Kedengan, sikenyo menga kena Judio weda kaw tolo te Timanem meneng songkani sen menge Judio weda tolo kandin, neidowan kaw den te Timanem. ³¹ Aw yan heman sen magaakan dan, songkani pengkay weda dan tolo te Timanem. Tanda te kaido din kenyo tepad kay keidowan dan heman te timanem modi aldaw. ³² Impetaga-taga te timanem nge sen kadita menge otaw meineng olipon te kandan menge sala amon ipekita din te kadita sen kandin kaido. ³³ Kahibolongan gayed sen kepiya te Tiamnem! Eked tadon kesokat sen kandin netagahan aw sen kandin kebiyasa, siini lay sen melesokat te kandin aneng-aneng aw te kandin menge pemaokit? ³⁴ Inikagi te solat, wedad neketaga-taga te aneng-aneng te Timanem, aw wedad meketolada kandin kon eden sen kandin dapat inengan. ³⁵ Wedad heman ibegay tadon kandin nge kailangan liwanan din." ³⁶ Kay sen kedita nge kedonen likat te Timanem, aw ininang ini pinaokit kandin aw para kandin. iduyun sikandin te wedad temanan! Amin.