¹ Menge kedowa ko, dakel gayen sen kanak aneng-aneng nge sen kanak menge doma Judio maluwas, aw seini ipegtawal-tawal ko diya te Timanem. ² Makatistigos a nge measeb dan te ketanem te Timanem. Menge weda da peketaga taga te kebenalan. ³ Kag weda da ketagahi se pemaokit te Timanem se matolid se otaw. Mig-inang dan baling te kandan pegkeotawan pemaokit aw weda dan illingi sen pemaokit te Timanem. ⁴ Weda dan pekelabet nge sen pnu nepenga kidoen ki Cristo. Pinaokit te inang i Cristo gada sebael nge egpemenal diyan kandin yan olo sen impetinono. ⁵ Kidoen iyan sen insolat i Moisis tepad te pegkematolid din pinaokit te pegtolo te punu: "Sen otaw nge meketolo te punu manginabuhi para te punu." ⁶ Meneng doen iyan sen inikagi te solat tepad te metolid kidon pineokit te pegsalig, "Ika-egkagi te kamno pegkeotawon, 'Sinu lay sen domotan te langit?' " (sen ibeg ipekelebat, te pegtana i Cristo dini.) ⁷ Ika heman eg-ikagi, "Sinu sen meketena te didelem te tana?" Sen ibeg ipekelebat, te peg-abet ki Cristo lekat te nematay.) ⁸ Doen heman kagi te solat, "Sen pulong te Timanem medepag kamno, kidoen te kamno sisi aw te kamno pedowan." Aw seini pulong te Timanem kidoen tepad te pemenal nge kamno intolada. ⁹ Kon ibalita nikaw nge si Jesus sikandin sen Timanem aw memenal ka te lekat te pedowan din nge inantay sikandin te Timanem lekat te pegkematay, mekelawa ka. ¹⁰ Kay sen otaw metolid te Timanem aw memenal sikandin te kinasingkasing, aw kon mabelita sikandin te kandin pegpemenal, mekelowa sikandin. ¹¹ Doen kagi sen solat, "Sen egpemenal kandin eked gayed keya-yai." ¹² Aw seini nge pesalig para te kedita. Judio kaw man o kana Judio, tepad kag sen Timanem, Timanem te kedita aw egpemegay sikandin te Grasya nge madagayaon te kedita nge egpedepag kandin. ¹³ Doen kagi te solat, "Se pengkey sinu nge megpedepeg te Timanem mekelowa." ¹⁴ Meneng menonin dan pegpedepag kandin aw weda dan pemenal? Aw menonin dan heman memenal kandin kon sikandan dineg tepad kandin? Aw menonin dan heman pegkedineg kon wedad megbelita kandan? ¹⁵ aw menonin dan peg-ipenaw ae pegsigulon te menge indan aw wea epeibing dan? Sumala te solat, "Onto mepiya se pegdateng te menge egtolada te mepiya indan!" ¹⁶ Meneng kana sen kadita egdawat te mepiya indan. Illing te inikagi ni Isaias, "Timanem, sinu sen nemenal te kenami intolada?" ¹⁷ Seini mekeikagi kidon nge sen otaw pemenal olo ki Cristo aw mekedineg sikandin te mensahe tepad diya kandan, aw seini mensahe dinineg olo kon doen megtolada kenyan. ¹⁸ Kwani, nekedineg lay sen meng Israelinhon kenyan nge mensahe? Eked keinang nge weda dan pekedineg, kay eg-ikagi sen solat, "Dinineg sen kandan kagi te pengkey kenan ogpeanan aw sen kandan menge pulong milanog te kebelad te keneyonan." ¹⁹ Eden man, weda dan lay pekelabet? Eked keninang nge weda dan pekelabet. Kay sumala te insolat i Moisis nekeikagi sen Timanem kandan, "Pasinahon niyo te menge otaw nge kana Israelinhon egkebensihan a niyo tepad kay impekita ko sen kanak keido te menge otaw nge weda kilala kanak." ²⁰ Minikagi heman sen Timanem kandan pinaokit ki Isaias (aw weda kelamiti kenyan si Isaias te menge otaw.) "Nakaplagan a te menge otaw nge weda pengeha kanak, aw pengkey weda dan peg-insa tepad kanak, migpeila a kandan kan sinu a." ²¹ Meneng tepad te meng Israelinhon minikagi sikandin, "Migpedeleg a te pegtegad kandan nge menge meteigul sen ulo dan aw menge masupilon nge lumiko dan kanak."