¹ Tilobo bata pa se menonod, iling te olipon bisan benal nga sikandin se tig-apo te kelahat nga kedonan. ² Doen menge otaw igseligan nga meg-elima kandin aw te kandin menge kedonan hangtod te penahon nga igtagal te kandin amay. ³ Sikitadon iling heman niyan kedengan te weda kidon pa meketaga-taga bahin te pegtoo. Ig-olipon kidon te keneyonan nga menge inang. ⁴ Meneng pegdateng te penahon nga igtagal te Timanem, igpeibing din dini te keneyonan se kandin bata. Igtebow sikandin te sebad ke baye aw negkinabuhi siyong te pena. ⁵ Amon tobosan se kelehat nga kidoen siyong te penu, amon sikita meinang bata te Timanem. ⁶ Aw tepad kay sikita menge bata te tTimanem, igpeibing din se Espirito te kandin bata dini te kenitadon menge posong. Yan iyan ng meketawal, kidon den te Timanem te "Amay." ⁷ Nayan ini: Kena kidon den menge olipon kon kena menga bata te Timanem aw tepad kay kitadon menge bata te Timanem, menonod kidon te kandin pigpakang nga menge pe nolondon. ⁸ Te sida weda kaw pa kilala te Timanem, mege olipon kaw te menge dios-dios. ⁹ Meneng siini nga kinilala den niyo se Timanem, (o mas mepiya sigoro kon mikagi a, siini nga kinilala kaw den te Timanem kagi nga kandin menge mengise) nenga ibeg den heman niyo megpeolipon kani. ¹⁰ Doen kaw pa mepiya nga menge aldaw, menge bolan, menge penahon aw menge omay. ¹¹ Neketana a nga basin se kedita nga peghago kidoen kenyo meinang wedad polos. ¹² Menge kedowa, negpeido-ido a kenyo nga ilingi a niyo, kay bisan Judio a, igselikway ko se pegtolo te penu te menge Judio aw pig-iling ko sikeyo menge kena Judio. Wedad neinang niyo medaet batok kanak. ¹³ Neketaga-taga kaw onto nga tepad te kanak pegsakit mekesangaw a te mepiya belita kidoen kenyo te mona higayon. ¹⁴ Aw bisan neda'tan kaw te keleinan te kenaken lawa weda a niyo pigselikway. Igdawat a niyo nga iling nga sebad ke anghel lekat te Timanem. Igdawat a niyo iling nga si Cristo Jesus se kenyo pigdawat. ¹⁵ Neluba kaw nidekey. Meneng eden se negemakan niyo siini? Siak mismo makapamatood nga nidekey kon meinang pa olo, bisan se kenyo menge mata lekaton niyo amon ibegay kanak. ¹⁶ Meneng siini ig-isip a niyo nga kebingkil tepad kay ig-indan ko kenyo se kebenalan. ¹⁷ Doen menge otaw kidoen nga egpekita kanak amon sikandan se kenyo depigan. ¹⁸ Kena medaet kon se doma otaw megpekita nga sikandan netetana kenyo bisan wedad a kidoen, kon mepiya olo se kandan pakay. ¹⁹ Minahal ko nga menge mengisi ki Cristo, telobo a negtagad nga se pedowan i Cristo kitaen kidoen kenyo. Iling a te tinebawan nga migbati. ²⁰ Dakel se kanak peningoha nga mekigtaking kenyo siini menge tekani amon mekeikagi a pa onto kenyo, kay netetana a kenyo. ²¹ Doen insaan ko kenyo menge ibeg megpesakop te pinu, weda kawba pekedineg kon eden se inikagi te penu? ²² Inikagi doton nga si Abraham doen didowa ke mengise nga meama, se sebad te kandin olipon nga si Hagar, aw se sebad te kandin sawa nga si Sara. ²³ Se kandin bata te olipon neotaw te tawhanon nga pemeokit meneng se bata din te kandin gyod sawa neotaw sumala te pakang te Timanem. ²⁴ Sini didowa ke baye penengteng te didowa ke kesebotan, si Hagar yan se penengteng te kesebotan nga igbegay te Timanem ki Moises te bontod te Sanai. Sini wedad lain kon kena se penu. Se kandin menge mengise neotaw nga menge olipon. ²⁵ Nayan si Hagar, yan se tokma nga bawa te bontod te Sinai te Arabia. Te kenita pa, iling te siyudad te Jerusalem siini. Tepad kay se menge otaw te Jerusalem unawa te menge olipon te kandan pegtolo te penu. ²⁶ Meneng si Sara kena olipon aw sikandin se penengteng te langitnong nga Jerusalem aw sikandin se kenidon inay tepad kay kena kidon olipon te penu. ²⁷ Kay nekeigi se kesotan, "Pegluba, baye nga eked pekebata! Olangoy ka te keluba, sikamno nga weda pa pekeokit te kesakit te pegpetebaw, tepad kay bisan igtenanan ka te kamno, sawa meama, lomiko sikandin kamno, aw mas medita pa se kamno meinang mengisi kaysale baye nga nekeogpa doma te kandin sawa meama." ²⁸ Menge kedowa, menge bata kaw den te Timanem somala te kandin pakang, iling ki Isaak nga neotaw tepad kay sikandin impakang te Timanem. ²⁹ Gebii, se bata i Abraham nga neotaw, te tawhanon nga pemeokit megpelumun te bata i Abraham nga neotaw pineokit te tolos te Espirito Santo. Aw yan heman ini se nagakahitabo kenitadon siini, igpelumun kidon te menge otaw nga migpesakop te penu. ³⁰ Meneng eden man se inikagi te Timanem kidoen te kesotan, "Lelagi se olipon nga baye aw se kandin bata, tepad kay se bata te olipon wedad bahin te panulondon te bata te baye nga kena olipon." ³¹ Nayan menge kedowa, kena kidoen iling te bata nga olipon kon kena te baye nga kena olipon.