¹ Apwiya anaahoolela; ntthapeke nlaponi, ntthapeke n'makissiro. ² Mahutte niipiphi Tjinawaarukureerya; essontte niissariya ekhomo yeehitjaaya. ³ Mooro onrwaa ohoolowaya ni onaaphwanha awananyaaya womiphantte tjooteene. ⁴ Nthukwaaya onaamwaleela olumwenku; elapo enoonaaya noothukumela. ⁵ Myaako tjinaathuluwa ohoolowaya Apwiya, Apwiya olapo yooteene. ⁶ Erimu tjintthonka essariyaaya, ni elapo tjooteene tjinawoona waaryawaya. ⁷ Yoonihatjiye ehaaya ooteene anaakokhorela anluku eethiru ni anaattottopela attontto. Anluku ooteene ankokhorele Yena. ⁸ Apwiya, Siao aahiiwa ni aahiittottopa, ni assaana aJuda yaahotthapa mwaha womalamulwaaya. ⁹ Kontha nhu, Apwiya, mwamuulupale olapo yooteene. Phinhu munkokhoreliya nanluku ooteene. ¹⁰ Nhu n'nafenta Apwiya, nkhotteke yootakhala! Ayena an'nikhavihera ekumi tjaattakattiifwaaya, ni Ayena anawaakumiha nmatatani mwaatthu oovavarya. ¹¹ Nthuko omwaresseliye waanassariya nootthapa, waatthu ooreera mirima. ¹² Ntteeliyeke wAapwiya, nhu ossariya, ni nvaheke mahala wowuupuwela ntjinanaya ttakatthiifu.