¹ Mwiipeleke Apwiya nintjipo nophiyaaru, mwiipeleke Apwiya elapo yooteene. ² Mwiipele Apwiya, nttottopele ntjinanaya; nlalyee woopolawaya khula nihuku. ³ Nkhuwele waaryawaya elapo tjooteene, mitekotjaya tjooreera nlaponi mooteene. ⁴ Kontha Apwiya oolupale ni phoophwanela ovuwihiya; Ayena phowooviya woovirikana anluku akhwaawe. ⁵ Kontha anluku ooteene onlaponi attontto, massi Apwiya ahunpa erimu; ⁶ owerya wooteene wawaya; ekuru niwaataana tjiri npaaniwaya. ⁷ Mwiipele Apwiya, nhu amutji onlaponi, mwiipele Apwiya waarya niikuru. ⁸ Mwiipele Apwiya niwaarya noophwanela ntjinanaya; n'mwaaneke tjoovaha ni nkeleke mapuro anvahiya okuttho. ⁹ Mwaakokhorele Apwiya, noophwaneliya npaanimwawe. Munthukumeleke elapo yooteene. ¹⁰ Muulumeke elapo niilapo: Apwiya anaahoolela. Olumwenku ori wookhaleene ni khun'hapussiya. Ayena anawaalamula atthu niissariya. ¹¹ Ntthapeleke erimu, ni mwiittottopeke elapo yovathi; mweetteke npahari niwatjooteene tjirivo. ¹² Mweettakatje nmattani niwatjooteene tjirivo; miri tjooteene tjintakhwani nkhuweleke nootteeliya ¹³ ohoolo wAapwiya, kontha ayena aniira awaaka; Ayena aniira awaaka wiira yiilamule elapo, Ayena an'hala olamula olumwenku niissariya weenan'na emotja naatthu.