¹ Kinaahala wiipa woohimala otthuna waaPwiya. Kinaahala okhuwela ekhweeliinhu womakhoto an'mwa. ² Kontha kihuulumatja: Otthunawinhu on'hala okhala woohimala; Nhu n'hottonka ekhweeliinhu wiirimu. ³ Kihopanka waataana nintthu nthanlalyaaka, kiholuphela wnrumeyaaka Davi. ⁴ Kinaahala waakhaliha assimutjaawe woohimala ni kinaahala woonihera ehitjaawe makhoto ooteene. ⁵ Erimu tjintthapela miiriiryatjinhu, Apwiya; ekhweeliinhu enaattottopeliya mwaatthu ttakattiifu. ⁶ Tupani wiirimu oolikanihiya naaPwiya? Waatthu owiirimu tupani ookhala phanka Apwiya? ⁷ Yena Nluku muulupale nttittimihiya nkanoni ttakattiifu ni nooviya naatthu ooteena anonrukureerya. ⁸ Apwiya Nluku aatthu ooteene, tupani oowerya phanka Nhu, Apwiya? Ekhweeliinhu enawoottonkani. ⁹ Nhu n'naahoolela epahari; mawinpi yavenha, Nhu n'naamaaliha. ¹⁰ N'hontankulatja Raabe phanka ntthu ookhwa. N'haatanhifu awananiinhu nimoonweenhu wookuru. ¹¹ Erimu niithaya tjawinhu. N'hunpa olumwenku ni tjitthu tjooteene tjirivo. ¹² N'hunpa ohitto nuutjulu. Tabor ni Hermom antthapela ntjinaninhu. ¹³ N'haana moono wokuru nintata noolipa, ni ekurweenhu en'nottottopeliya. ¹⁴ Mahala niissariya erumeelo tjeehitjeenhu. Ottuna niikhweeli tjawinhu. ¹⁵ Ootteeliya phaale anookokhorelani! Apwiya, ayena aneetta muntthukoni weekhoveenhu. ¹⁶ Ayena antthapela ntjinaninhu nihuku nooteene, ni antthapela essariyeenhu. ¹⁷ Nhu mweekurwaaya ni mwaha weessontteenhu ayena an'notthema. ¹⁸ Kontha mwinkitthweehu phuwaaPwiya; ttakattiifu owiisrael phuwaamwenieehu. ¹⁹ Khalayi khalayi, mwaahowuulumana nkhoveni amuuniniinhu; mwiiraka: "Kaahotthapela omwene ntthu n'motja okuru; kaahonvussa oothanliya eriyari yaatthu. ²⁰ Kaahonthanla nrumeyaaka Davi, ni makhuraaka ttakattiifu kaahontthapela. ²¹ Ntatanaka ninaahala omweettihera; moonuaaka onaahala onlipihera. ²² Khaavo n'wanani n'hala onthepya; khaavo ntthu n'hala on'huviha. ²³ Kinaahala waakwanhula awanani ohoolowawe; kinaahalaowiiva ooteene yaale anonthanha. ²⁴ Ekhweelyaaka nin'nemanaka tjin'hala okhala niyenani; mwaha wontjinanaka, yna naahala okhala ootthema. ²⁵ Kinaahala weessenra ntatanawe opahari nintatanawe noolopwana nmamuro. ²⁶ Yena naahala okiihana: Nhu mwaathumwanaka, Nlukwaaka niwoopwaawaka. ²⁷ Tootho kin'hala onkhaliha owantjera, oottottopelessiya nlaponi. ²⁸ Kinaahala ontaphulela n'nemanaka noohimala; ni waataanawaka on'hala okhala niyena. ²⁹ Kinaahala waakhaliha assimutjaawe mahuku mentji, ni ehitjaawe enaahala okhala phanka wiirimu. ³⁰ Assaaneenhu yahiya eketteluaaka ni yeehiwelele tjoorumatjaka, ³¹ ni yakwanhulatja ekhalelotjaka ni yeehiiwelele, ³² vano, kinaahala waattarussa watjoovaratjaya. ³³ Massi akin'hala omwaakha nfentwaaka, wala akin'hala okhala oohinuulumo wa yookhuluvelihaaka. ³⁴ Akin'hala okwanhulatja waataanawaka wala orukunussa moolumo wamalakuniwaka. ³⁵ Kiholuphela emaara emotja weettakattiifwaaka yooteene _ Akin'hala omoothatjera Davi_ ³⁶ anonttharenla anaahala ohalana ehitjaawe, tjitjon'mo phanka ntjuwanaka. ³⁷ Yena ojuweliya npakha khalayi, tjitjon'mo phanka mweeri, namoona okhweeli wiirimu." ³⁸ Massi Nhu n'hon'huluwa ni n'honkhotta; ni n'horussiya nimwene ntthapenleenhu. ³⁹ N'hon'hiiha waataana wanrumeyiinhu. Etthuvwaawe n'horihela vathi. ⁴⁰ N'homorihatje essiritjawe tjooteene ni n'hokwanhulatja emattatjawe. ⁴¹ Yaavira ooteene ahomwin'nhera. Yena aakhanletho ettho yoohikhala mwaamwaattaman'nuaawe. ⁴² N'hottottopela ntata noolopwana naawananyaawe, n'haahiya awananyaawe ooteene ahakalalaka. ⁴³ N'hohokolossa ekatanaawe, ni khamunkhaviherale okhottoni. ⁴⁴ N'homaliha ekhalelwaawe; n'homorihela ehitjaawe vathi. ⁴⁵ N'haakuvatjiha mahukwaawe eenanttonpe ni n'honkhuneela ehaaya. ⁴⁶ Npakha eyaakhani, Apwiya? N'nohala wiipitha mhuku ooteenne? Orussiyawinhu on'hala opaha phanka mooro npakha eyaakhani? ⁴⁷ Ooh, muupuwele owakathyaaka ori vakaani ni khan'wunpale mahala assaana aatthu! ⁴⁸ Tupani npheela okhala ni woohikhwa, wala okussa ekumyaawe mooweryani mokhapure? ⁴⁹ Apwiya, mitekotjinhu tjon'nema tjanluphenleenhu Davi tjiri vayi? ⁵⁰ Muupuwele, ooh Apwiya, miteko tjivariye ninrumeyiinhu ni tjivilenlyaaka wanrimani oruwaniya ventji naatthu. ⁵¹ Awananiinhu ahoruwana, Apwiya, ni ahomwaattatja ntthapenleenhu. ⁵² Oottottopeliya akhale Apwiya mahuku ooteene. Amem.