¹ Apwiya, Nluku moopolyaaka, kinawookhuwelani othana noohiyu. ² Mwiiwe mavekelwaaka, mwiiwe wunlawaka. ³ Anookitjara mahuviho ni ekumyaaka ehophwanha okhwa. ⁴ Atthu ankikhaliha phanka ntthu oopheela othipeliya; kintthu oohikuru. ⁵ Kihotthawiya naatthu ookhwa; kiri phanka atthu ookhwa ooriheliya n'mahiye, wantthu hinon'watjeratjeenhu, kontha ayenatja ahohuluwatja nphantteenhu. ⁶ Nkeessale munlikittini nowinssa, mooripela ni mowinssa. ⁷ Orussiyawinhu onaakilemela ni mawinpyeenhu anaakimorela. ⁸ Mwaha waNhu, ankitjuwela an'nokirattaveenla. Nhu nkikhalihale ntthu oohitjivela waayenatja. Kinoorukureeriya ni akinoona makhumelo. ⁹ Meethwaaka ahotteethyaa mwaha womakhalelwaaka; kinawookhuwelani nihuku nooteene, Apwiya. Kin'nootaphulelani matataaka. ¹⁰ N'nohala waapankel miiriirya atthu ookhwa? Akhwale anaahala ovuwa niwookokhorelani? ¹¹ Atthu ookhwa anaahala olalyaa noohimya ekhweeliinhu? ¹² Miriiryatjinhu tjinaahala otjuweliya mwiipiphini, wala mahaleenhu nipuro nooliyaliya? ¹³ Massi kinookhuwelani Nhu, Apwiya, owitjissu mavekelo anawoophwanhani. ¹⁴ Apwiya, n'nokikhottelani? N'nokivithelani ekhoveenhu? ¹⁵ OKhuma emwaavanuaaka, kaari nen'ne nen'ne oohuva woopheela okhwa. Kihohuva tjinene; kiri ookutakuthyaa. ¹⁶ Oruusiyawinhu ohokiphwanha ni tjitthutjinhu tjoowoopiha tjihokikwanhula. ¹⁷ Tjineetta phanka maatji nihuku nooteene; ooteene anaakirukureerya. ¹⁸ N'hokaakha assnpwanaaka ni ankitjuwela ooteene. Nkitjuwela n'motja paassi epiphi.