¹ Mwiiwe, Apwiya, ni nkaakhule, kontha kimassikhini ni oohuva. ² Nkikhavihere, kontha kin'niiwelela; Nlukwaaka, n'moopole nrumeyiinhu nookhuluvelani. ³ Nkoonele ekiriri, Apwiya, kontha kinawookhuwelani nihuku nooteene. ⁴ Muntteelihe nrumeyiinhu, kontha phinhu kinoovekelaakani. ⁵ Apwiya, phinhu oophwanela. Oophwanela olevenla, n'nawaawiihera n'nema ooteene anookhuwelani. ⁶ Apwiya, mwiiwe mavekelwaaka ni mwiiwe okhuwelawaka. ⁷ Nihuku noossanka, kinaahala wookhuwelani ni Nhu n'naahala okirumenla. ⁸ Khaavo anluku oolikanihiya ni Nhu, Apwiya; khatjivo tjoovariya phanka tjawinhu. ⁹ Elapo tjooteene tjunpaleenhu tjinaahala owa wookokhorelani, Apwiya, ni anaahala ottittimiha ntjinaninhu. ¹⁰ Kontha Nhu mwamuulupale ni mitekotjinhu tjomiriirya; phinhu Nluku paassi! ¹¹ Nkifunttihe, Apwiya, mittalatjinhu, vano kinaahala weettela ekhweeliinhu. Ntthonkomanihe nrimaaka wiira woove ntjinaninhu. ¹² Apwiya, Nlukwaaka, kinaahala owiipelani ninrimaaka wooteene ni kinaahala ovuwiha ntjinaninhu woohimala. ¹³ Nuulupale n'nemaninhu; Nhu n'hokumiha ekumyaaka nkhapure mowinssa. ¹⁴ Nluku, ntakhali aanokeetta. Atakhali entji yaanoomolaniha ekumyaaka. Ayenatja khaoohissimwaleni. ¹⁵ Massi Nhu, Apwiya, maNluku okiriri ni omahala, oopitja orussiya n'nemaninhu nintji niikhweeli. ¹⁶ Nkihokoleele ni nkoonele ekiriri; mun'vahe ekuru nrumeyiinhu; nmoopole mwaana amwaamwaninhu. ¹⁷ Nkithoonhere ethoonhero emotja yeessontteenhu. Vano, yaale ahinkipheela anaahala woona ehaaya, kontha NhuApwiya, n'naakikhavihera ni n'naakilipihera.