¹ Apwiya Nhu n'hothoonhera n'nema elapweenhu; n'hokwanhulatja makhalelo aJaco. ² N'holevenla tjoovara tjaatthweenhu; n'hokhuneela etanpitjaya tjooteene. ³ N'hoomola orussiyawinhu; n'hohapussa orussiyawinhu. ⁴ N'noopole, Nlukweehu, ni nkukihe eriyariihu orussiyawinhu. ⁵ N'nohala orussiya nihiivano mahuku ooteene? N'nohala okhala oorussiya mwaha womakhoto an'mwa? ⁶ Khn'nokhalatho nihi? Vano, atthwaayo anaahala wootthapelani. ⁷ N'nithoonhere ekhweeliinhu, Apwiya, n'nithoonhere woopolawinhu. ⁸ Kinaahala wiiwa Apwiya Nluku en'himyaaya, kontha an'hala okhala naatthwaaya, owaattharenla owaamini. Vano khanphwanela waakulela ovara tjoohikhala. ⁹ Weekhweeli, woopolawinhu ori wakhiviru wayaale an'woovani; vano, waarya onkhala nlaponiwihu. ¹⁰ Waataana niikhweeli onaahala okhala vamotja; essariya ninrettele onaahala waataana. ¹¹ Ekhweeli enaahala otaphuwa vathi niissariya enaahala woona okhuma wiirimu. ¹² Khweeli, Apwiya anaahala ovaha miteko tjomaana ni etthayeehu enaahala oruwerya mihokorokhotjaya. ¹³ Essariya enaahala okhala ohoolowaya ni anaahala ohula nttala munviraaya.