¹ Noofentessiya nipuro ninkhaleenhu, Apwiya aatthu oteene! ² Eroohwaaka enkhala ninhu Apwiya; nrimaaka nookhuwelawaka wooteene mwaha waNluku nkumi. ³ Hata mwaanuni hophwanha enupa, naassipalame, epuurutjaya, mun'halaaya othuka assaanaaya; mi kihophwanha altaareenhu, Apwiya aatthu ooteene, Mweniaaka ni Nlukwaaka! ⁴ Ooreerihiya phaale ankhala npaanimwinhu; yaale anookhuwelani mahuku ooteene. ⁵ Ooreerihiya ntthu neetta niikurutjinhu, wanrimaniwawe nari ratta. ⁶ Yiiviraka muro Baca, an'nophwanha mwaamuro tjomaatji tjoopheela ovurya, phanka epula tjowantjera tjineemessaaya maatji. ⁷ An'neettatja tjinene, npakha khula ntthu wanphiyaawe waNluku oSiao. ⁸ Apwiya, Nluku aatthu ooteene, mwiiwe mavekelwaaka, mwiiwe enuulumaaka, Nluku aJaco! ⁹ Ooh Nluku, mwinkitthweehu, nthoonhere okutakuthyaawinhu wayoole ntthapeleenhu. ¹⁰ Kontha yooreera okhala nihuku nimotja ninhu ovirikana okhala mahuku mentji nipuro nikhwaawe. Kinawaamini okhala wankhora yonupa yaNluku kikhalaka n'heemani mwaamalapo. ¹¹ Kontha Apwiya Nluku ntjuwa nimwinkittho; Apwiya anaavaha mahala ni nttittimiho; Yena khanaakhottiiha tjooreera wayaale anvara tjooreera. ¹² Apwiya aatthu ooteene, ooreerihiya ntthu nookhuluvelani.