¹ Ooh Nluku, amalapo ahokela nlaponomwinhu; ahotankanhatja enupeenhu ttakattiifu ni Jerusalem ahokhalihatja nipuro nomanhala. ² Erutthu tjaanantekweenhu avahatjale enuni okhaliha eyoolyaaya, erutthu tjaatthweenhu owaamini, enama tjulupale tjovathi. ³ Ahomaressatja ephome tjaatthu ookhwa phanka maatji, oJerusalem, ni khaarivo ntthu oopheela waassikha. ⁴ Nin'noveehiya namwaattamano, otarawiya naale an'niwehaweha. ⁵ Npakha eyaakhani Apwiya? N'nohala orussiya mahuku ooteene? Ehatjen'nhu en'hala ophare phanka mooro owakathini? ⁶ Mwaakurussele orussiyawinhu amalapo ahinootjuwelani ni ahooleli ahintthapela ntjinaninhu. ⁷ Kontha ayenatja ahontankulatja Jaco ni ahokwanhulatja eviilatjaya. ⁸ N'hinikhuneele etanpi tjaatthu okhalayi; mitekotjinhu tjomiiriirya tjikhale nihi, kontha niri ootjukulatja. ⁹ N'nikhavihere, Nluku owoopwaawihu, mwaha wowaarya wontjinaninhu; n'noopole ni n'nilevenle etanpitjihu mwaha wonfento nontjinaninhu. ¹⁰ Amalapo yaahala wiirelani: Nlukukwaaya rivayi?" Ephome emwaressiye yaanantekweenhu elamuleliye amalapo, ohoolowihu. ¹¹ Wunla waanantthukiya owe ohoolowinhu; nuuweryawinhu wuulupale, alamuleliye wookhwani. ¹² Amalapo yaattaman'naleehu mwaavahe emaara saapa oveha tjooveehalyaayani, Apwiya. ¹³ Vano, hiivano atthweenhu niipwittipwitthitjinhu, ninaahala woovahani mahala oohimala. Ninaahala ottonka tjoovaratjinhu makhoto ooteene.