¹ Mwiiweehe tjin'himyaaka, atthwaaka, mwiiwe moolumo onmwaanomwaka. ² Kin'hala wuulumatja ninlikaniho; kin'hala ohimyatja tjitthu tjoovithiya tjokhalayi. ³ Tjiiwaleehu ni tjifunttaleehu, an'nathumwanihu tjinittonkenlyaaya, ⁴ khanin'hala ovitha waassimutjiihu. Ninaahala waatonkela atthu miteko tjaaPwiya tjin'halaaya ovara, ekurwaaya, nimiiriirya tjipankalyaaya. ⁵ Kontha Ayena yaahohimyatja ekettelo tjowaataana oJaco ni yaahohimyatja nlamulo wiisrael, yuulumatjaka wiira atthu okhalayi yaassomiheke assaanaaya. ⁶ Tjitjon'mo yaahuulumatja wiira nikhoto nikhwaawe nitjuwele ekettelotjaya, assaanan ahinayariya, yaahaana yaattonkelaka assaanaaya. ⁷ Vano, ayenatja yaanaakhalana okhuluvela waNluku ni khayaaliyala tjoovaratjawe, massi yaanaassunka tjoorumatjaya. ⁸ Ayenatja khayaahala okhala phanka atthu okhalyi, naari nikhoto noohiiwa ni noohanhuriha; nikhoto naari nonrima woohikhala, ni n'nepaaya khawaari niNluku. ⁹ Assaana aEfraim yaari ootthonkomaniaa yaahotthwa okhottoni. ¹⁰ Ayenatja khayaarina waataana waNluku, khayiwenlale ekettelwaawe. ¹¹ Ayenatja yaanowiiliyaliha tjoovaratjawe ni miiriirya tjaathoonheraliaaya. ¹² Miiriirya tjaapankiye ohoolo waatthu okhalayi elapo yowiigiipitu, elapo ya Zoa. ¹³ Yena aahaawayaniha epahari ni aahaalapussa; yena aahovussa maatji. ¹⁴ Nihuku nooteene, aweettihera phanka nihutte ni, ohiyu wooteene, ninthuk womooro. ¹⁵ Yena aahopwessa mwala moothakoni, ni aahaaavaha maatji mentji, oopheela otjara npahari. ¹⁶ Yena aahokumiha maatji mentji ni maatjyaayo yaahovira n'mamuro. ¹⁷ Nan'lelo tjitjon'mo, yaanopanka etanpi, ahanhurihaka wiirimu moothakoni. ¹⁸ Ayenatja yaanomweetta Nluku wanrimaniwaya alepelaka eyoolya wiira amalihe etalaaya. ¹⁹ Ayenatja yaanomuulumatja Nluku: Weekhweeli Nluku, aanaahala onitthonkomanihera meetja moothakoni? ²⁰ Nihotjuwela wiira owakathi waattalyaawe mwala, yaahokhuma maatji mentji, naahala onivaha tootho nkatthe? Naakumiha enama avaahaka athwaawe? ²¹ Owakathi wiiwalyaaya Apwiya, yaahorussiya; vano, moorwaaya waahopharela oJaco ni orussiyawaya waahophiya wiisrael, ²² kontha ayenatja khankupanli Nluku ni khaakhuluvenle woopolawawe. ²³ Vano Yena aahiirela erimu ni tjaahohulyaa mikhoratjaya. ²⁴ Yena aahokurussa mana wiira alyatje, ni yaahaavahatja etthaka tjowiirimu. ²⁵ Atthu yaahokhuura nkatthe womalaikha. Yena aahaakurussela eyoolya yintji. ²⁶ Aahorweehela ephyoo otjulu ni, niikurwaawe, aahorweeha ephyoo onkhuma ntjuwa. ²⁷ Aahokurussela enama phanka ntthupi, enuni tjntji phanka npuussu wonpahari. ²⁸ Tjen'nha tjaamorelale eriyari woothukumaniya, woorukureerya aheema. ²⁹ Vano, yaaholyatja npakha waatossatja, kontha ayena yaavahale yaapheelatjaaya. ³⁰ Massi, ehinaaya waatossata, eyoolya nan'lelo enari mwaanomwaya, ³¹ orussiya waNluku waahaakhumenla ni yaahowiiva akhulupalyaaya. Ayena yaahaamoriha ananttonpe owiisrael. ³² Wanookhalaru tjon'mo nanlelo yaanovara tjoonhala ni ahaaminiki tjiivaratjawe tjomiiriirya. ³³ Phimaana, Nluku aahovukula mahukwaaya; eyaakhatjaya tjaahotjara tjoonhala. ³⁴ Khula nkhwaha Nluku waattarussaaya, ayenatja phwantjeraaya onrweela, ni yaanohokolyaa i, niikuru yaanonrweela. ³⁵ Ayenatja yaanuupuwela wiira Nluku mwalaaya ni erimu moopolyaaya. ³⁶ Ayenatja yanttottopela nimalakwaaya, massi yaamootootha nimoolumwaaya. ³⁷ Kontha mirimatjaya khatjaari tjokhweeli niNluku, ni ayenatja khayaari oophanela ni waataanawawe. ³⁸ Nluku nari okiriri, aahaalevenla tjoovaratjaya ni khaakwanhulatjale. Khweeli, emaara tjintji, ayena yaahorussiya ni khaapahale mooteene. ³⁹ Yaahuupuwela wiira ayenatja yunpiye mwiirutthuni, phanka ephyoo envira ehihokolyaaka. ⁴⁰ Yaahonkhotta emaara tjintji moothakoni ni ⁴¹ Yaahonvirussa nmathalani! Yaahonttehettehatho Nluku ni yaahonveeha Nluku owiisrael. ⁴² Khayuupuwelale tjaavaralyaawe wala tjaakumihalyaawe mwaawanani, ⁴³ waathoonheralyaawe mithoonherotjawe tjuulupale wiigiipitu nimiiriiryatjawe elapo ya Zoa. ⁴⁴ Myuuro tjowiigiipitu yaahokhaliya ephome, wiira ahoone nipuro noopheela owurya. ⁴⁵ Yaahokurussa ephenpele tjintji wiira tjaakhuure, ni amarapi yaakhuneelale mwaakhalaaya. ⁴⁶ Aahokurussa etjoroope, tjaalya etjoolya tjon'mattanimwaya. ⁴⁷ Ayena yaahohonona emattatjaya nooririya. ⁴⁸ Aahorimeeliha enamatjaya. ⁴⁹ Orussiyawawe aahaawaanela oviha , nookurussa epaluwa yuulupale. ⁵⁰ Orussiyawawe wooteene; khaalevenlale aahowiivakatja ni waakurussela assinttunttu. ⁵¹ Aahowiivakatja oopatjera oyariya ooteene owiigiipitu, oopatjeriya onkhuluvelwaaya nmaheemani oCam. ⁵² Aahoweettihera aathwaawe arweehaka ota phanka enama ni aahoweethihera moothakoni, phanka epwittipwitthi. ⁵³ Aahoweettihera atthwaawe,ninroromelo ni woohoova, ni epahari yaahaakhuneela awananyaawe. ⁵⁴ Vano, aahaapiha nlaponimwawe mowaarya, npakha omwaako waakussalyaawe niikurutjawe. ⁵⁵ Aahowoomola nlaponi amalapo ni aahaakawela makhoto owiisrael aheemaaya. ⁵⁶ Nanlelo tjitjon'mo, yaahonttehatteha Nluku ni khaayaakhalelale tjookhuluvelihatjaya. ⁵⁷ Yaahonrukunuwela Nluku phanka tjiiralyaaya an'nathumwanaya; yaari oohikhuluvelyaa. ⁵⁸ Yaahonrussiha Nluku mwaha womapuro aanaiini ni yaahomunliha ehatje mwaha wowaakokhorela anluku oohikhala. ⁵⁹ Nluku wiiwalyaawe tjon'tmo, aahorussiya, ni aahonkhotta Israel. ⁶⁰ Yena aahohiya enupa yomavekelo yo Silo, heema waakhalaawenaatthu. ⁶¹ Aahotthuniha wiira nivukunawe nikhale noovariya ni aahovaha waaryawawe nmatatani mwan'wanani. ⁶² Aahaaviruwela atthwaawe, ni aahaahiya yiivakatjiyaka okhottoni. ⁶³ Mooro waahaapaha ananttonpyaawe, ni amwaavano athiyana khayaarinatho wiia. ⁶⁴ Anankuttho yaahiivakatjiya niikatana, ni anankhweli khayunlale. ⁶⁵ Vano, Apwiya yaahovuwa phanka oorupa, phanka nakhotto nkhuwela mwaha wonipha. ⁶⁶ Yaahowoomola awananiaaya ni yaahowooniha ehaaya yoohimala. ⁶⁷ Yaahonkhotta heema aJose, ni khaathanlale nloko na Efraim. ⁶⁸ Athanlale nloko na Juda ni mwaako Siao, waafentaaya. ⁶⁹ Yaahorehenryatja npaanimwaya phanka wiirimu, phanka elapo yovathi tjunpalyaaya womahuku ooteene. ⁷⁰ Yaahonthanla Davi, nrumeyaaya, ni yaahokhaliha n'hakheli onama. ⁷¹ Yaahonkumiha muntekoni mweehakheli niinama naassaanaaya, ni yaahon'waana wiira akhale n'hakheli a jaco, ni Israel. ⁷² Davi aahoweettihera atthwaawe ninrimaawe wooreera ni aahaakhapenla nimatataawe.