¹ Nintjuunaka, kinankhuwela Nluku; nintjuunaka, kinankhuwela Nluku ni Yena naakiiwa. ² Nihuku noohuvaaka, kinawaarweela Apwiya; ohiyu, kinaataphulela matataaka ota ni khaanootjyaa. Nrimaaka onaakhotta omaalihiya. ³ Kinaamuupuwela Nluku kakhala ootteetthyaa; kinaamuupuwela kakhala nimikutakutho. ⁴ Nhu n'naakhaliha meethwaaka ootthukuwa; akinkhwitiri wuulumtja. ⁵ Kinuupuwela mahuku okhalayi, nimahuku avirale. ⁶ Ohiyu wooteene, kinawuupuwela ntjipo niipalyaaka nihuku nimotja. Kinawuupuwela ratta noomananiha otjuwela yiiranyaale. ⁷ Apwiya khan'hala okiheelatho? Ayena khan'hala okithoonheratho n'nemanaya? ⁸ Nfentwwenhu wokhweeli khun'mwaatho? Ekhuluvelihaleenhu khin'mwaatho? ⁹ Apwiya n'nooliyala okhala omahala? Orussiyawinhu ohofuttha nfentweenhu? ¹⁰ Kineera: "Olemelawaka: moono weelopwana owiirimu ohonipittikuwela." ¹¹ Massi kinaahala owiiha muupuwelelo watjoovaratjinhu, Apwiya, kinaahala wuupuwela mitekotjinhu tjomiiriirya tjokhalayi. ¹² Kinaahala okhalela tjoovaratjinhu ni kinaahala wuupuwela tjen'nho. ¹³ Nttaleenhu, ooh Nluku, ttakattiifu; wiira nluku alikanihiye niNlukweehu muulupale? ¹⁴ Nhu mwaNluku npanka miiriirya; Ekurutjinhu n'nawaavaha atthu. ¹⁵ Nooweryawinhu wuuluale, Nhu n'haavaha otthema atthu, amutji a jaco ni Jose. ¹⁶ Maatji yaahowoonani, ooh Nluku, maatji yaahowoonani ni yaahoova, atthu yaahotuthuwa. ¹⁷ Mahutte yaahomwaressa maatji, erimu tjaahoopa etari, mwaahoriha mattheereenhu. ¹⁸ Ntjuuninhu notari naahiiwanyaa nphyooni; overunha waahomwaleela etuniya; elapo yaahottettemela ni yaahomala. ¹⁹ Mweettelweenhu waavirale npahari ni nttaleenhu waavirale n'maatjini, massi mwaavireenhu khamooniye. ²⁰ Nhu n'howeettihera atthweenhu phanka nphwinko wonama, nmatatani mwa Moises ni Arao.