¹ Nihoovahani mahala, ooh Nluku; nihossukhuru, kontha ntjinaninhu niri wakhiviru; atthu an'nokhuwela miiriiryatjinhu. ² Kathanla owakathi woophwanela, kinaahala olamula nin'nema. ³ Hata atthu ni tjitthu tjooteene tjirivo wanoovaaya, Mi kinaalipihera. ⁴ Kaahowiirela atthu oohikhuluveliaa: N'hiikurumatje! Atthu oovavaryaa: N'hiittottope! ⁵ N'hiikukhulihe, wala n'huulumatje wowiittottopa. ⁶ Kontha otthema khun'mwa, ohitto wala otjulu, wala mootjakoni. ⁷ Massi Nluku nphuki; Yena namwaakha onvaha nkhwaawe. ⁸ Kontha ehaavo ekopho emotja nmatatani mwaaPwiya, ni nipha noniphooru nootakanihiya nijoowaawiha, ni Ayena anaamwaressa. Weekhweeli, oopapharyaa ooteene onlaponi anaahala owurya npakha ettonhi yoomalea. ⁹ Massi, miivano, kinaahala ohimyatja woomalela enpankaleenhu, kinaahala omwiipela etjipo Nluku a Jaco. ¹⁰ Yena niira: "Kinaahala omalihatja ekuru tjaatthu oopapharyaa, massi ekuru tjaanassariya tjinaahala wuunuwihiya.