¹ Nluku, kontha essiyani onihiyaka woohimala? Kontha essiyani orussiyawinhu opahaka enama tjontakhwaniwinhu? ² N'mwaane muupuwelelo waatthweenhu, yoole nthanlaleenhu mahuku okhalayi, yoole nphwanhaleenhu wiira akhalane yoohalaneenhu, ni mwaako Siao, onkhaleenhu. ³ N'mwe n'wehe okwanhuwatja woomalela, n'wanani tjitankulaliaawe nipuro ttakattiifu. ⁴ Awananiinhu ahotankula eriyari wonipuro ithanlaleenhu; ayenatja ahothomiaatja ethoonero tjookhottoni. ⁵ Ayenatja ahokwanhulatja nimatjatto, phanka etakhwa yuulupale. ⁶ Ayenatja ahopwessakatja tjooreerela tjooteene; ahohon'natja niyuuma tjoolemela. ⁷ Ni ahoparihelata mooro npaanimwinhu; ahotankulatja nipuro ninkhaleenhu, amorihelaka vathi. ⁸ Ahuulumatja wanrimaniwaya: Ninawaakwanhulatja ooteene". Ni ahopahakatja enupatjinhu tjooteene tjonlaponi. ⁹ Khainoonatho nthoonhero wo miiriirya waNluku; khaavotho arumeyi, ni khaavo wahi ntjuwela nihuku noomalela. ¹⁰ Npakha eyaakhani, ooh Nluku, n'wanani wan'halaawe wooruwanani? N'wanani naahala oveeha ntjinaninhu woohimala? ¹¹ Essiyani ohitaphlaka ntataninhu, ntataninhu noolopwana? Nkumihe ntataninhu noolopwana nkuwonimwinhu ni mwaakwanhulatje. ¹² Massi Nluku nkhalaaka weniaaka okhuma mahuku okhalayi, awaanaka woopola nlaponi. ¹³ Nhu n'hokawaniha epahari mwaha wokurutjinhu; phinhu mwaapwessakatjale muru tjaatakhali n'maatjini. ¹⁴ Nhu n'hiiva enama yuulupale yon'maatjini yiihaniya Leviata ni mwaahaavaha olya atthu yaakhala moothkoni. ¹⁵ Mwaahotthukula mittala; mwaahuumiha muro tjuulupale. ¹⁶ Nihuku nawinhu, ni ohiyu wawinhu; ntjuwa nimweeri n'heessa nipuronaya. ¹⁷ N'hopanka mwiinano tjooteene vatthayani; Nhu n'hunpa elimwe niiyiita. ¹⁸ Muupuwele n'wanani tjinooruwanaaweni, Apwiya, phanka atthu yaaveeha ntjinaninhu. ¹⁹ N'hivahe ekumi yokhuntteenhu weenama yontakhwani. N'hiliyale woomalela ekumi yaatthweenhu oohaawa. ²⁰ N'mwiihe muupuwelelo waataanawinhu, kontha mapuro ooripela ovathi tjinootjara tjoonhala. ²¹ N'hin'hiye oohuva aakulelaka woonihatjiya ehaaya. Oohuva ni massikhini avuwihe ntjinaninhu. ²² N'vuwe, Nluku; mwaathoonhere ooteene wiira Nhu mokhweeli; muupuwele atakhali tjinooveehayani nihuku nooteene. ²³ N'hiliyale tjaawuulumelaayani ni yaawoomolanihani.