¹ Weekhweeli, Nluku phooreera wiisrael, wayaale ooreera nrimaaya. ² Massi, wonphanthyaaka; enhaatjaka tjinaapurulyaa; ³ kontha kinawoonela nttima waatthu owakathi woonaliaaka wanriihawaya. ⁴ Kontha ayenatja khaavirale nmahuvihoni wala mookhwani, massi phoolipatja ni anaalyatja. ⁵ Ayenatja aritji ratta nimirintti nimakhwelo makhwaawe; khan'huvatja phanka atthu akhwaawe. ⁶ Anawiittottopa phanka atthu oowara tjoowara nssikoniwaya; tjootakhala tjihaawara phanka ekuwo. ⁷ Ankhala phanka atthu oohoona noowa etampi; muupuwelelo tjootakhala tjinkhuma waroohniwaya. ⁸ Nooveehawaya, anuuluma tjitthu tjootakhala; niwiikurumatja, an'noopopiha ni tjoovara tjootakhala. ⁹ Nimalakwaaya an'nuuluma onhala wiirimu, nimalimiaaya an'noolumela onhala etthaya. ¹⁰ Weenan'na yeela, atthwaaya an'naahokoleela ni anaawurya, ventji, womoolumwaaya. ¹¹ Ayenatja aniiratja: Nluku ntjuwela tjani? Erimu ehaavo entjuwelaaya? ¹² Atthwaayo khantjuwaniaatja; ayenatja ankhala wohikutakuthyaa, akhala oothatjiri. ¹³ Weekhweeli yaari emahala ossunka nrimaaka ni waakhalaaka kivilelaka. ¹⁴ Kontha kaakhala oohuva nihuku nooteene, ni kinaafuntta khula owitjissu. ¹⁵ Kinuulumatjale kiiraka: "Kinaahala wuulumatja tjitthun'nha", kanawaatumiha amutji aassaanaa. ¹⁶ Hata kinamananihale wiiweeha, yaari etthu yookirikarikela. ¹⁷ Vano kaahokela npaani mwaNluku ni kaahotjuwela emalelwaaya. ¹⁸ Weekhweeli, Nhu n'noweessa mapuro oothenrya; Nhu n'nawaamorissatja. ¹⁹ Ayenatja anaatankuwatja woohipitjyaatja, ni ankhala ookussiya niiphyoo. ²⁰ Ayenatja ankhalatja phanka elohi onun'wale; Apwiya, mwavuwavale, Nhu khiivo en'haleenhu wuupuwela waayenatja. ²¹ Kontha nrimaaka wari woohuva, nimi kaari oorakala. ²² Kaari ntthu oohiloka ni ookhotta; kaari phanka enama yontakhwani ohoolowinhu. ²³ Mwatjooteene, kinkhala nen'ne nen'ne niNhu; Nhu mun'novarenla ntatanaka noolopwana. ²⁴ N'naahala okeettihera nimoolumweenhu ni, ohoolo, n'naahala okaakhenla niwaarya. ²⁵ Tupani rinaaka wiirimu woohikhala Nhu? Khaavo elapo yovathi nonpheelaaka woohikhala Nhu. ²⁶ Erutthwaaka ninrimaaka tjinaatteethyaa, massi Nluku ekuru tjonrimaaka womahuku ooteene. ²⁷ Yaale ari ottayi niNhu anaahala orimeela; Nhu n'naahala waakwanhula ooteene ahinoopheelani. ²⁸ Massi miivano, enpheelaka ovara yooteene omwaattamenla Nluku. Apwiya Nluku kaakhalihale ntthawenlwaaka. Kinaahala okhuwela tjoovaratjaya tjooteene.