¹ Munvahe mwene ekettelotjinhu tjossariya, ooh Nluku, niissariyeenhu mwaana amwene. ² Yena aalamule atthweenhu ninfento ni amassikhiniinhu niissariya. ³ Myaako tjikhalane nrettele waattheenhu, ni atthu akhae ninrettele. ⁴ Yena aalamule amassikhini aatthu, oopole assaana aatthu oothowiya ni aakwanhule ootakhala. ⁵ Yoottottopeleni ntjuwa niira nikhumaka ni wakhala mweeri, womakhoto ooteene. ⁶ Akhuruwe phanka epula wamalassini ooreera, phanka epula emitjeraka etthaya. ⁷ Anassariya areereke ahukwaaya, ni okhaleke nrettele mwintji npakha wahinkhalaaya mweeri. ⁸ Yena atjuweleleke epahari niikhwaaya, nmwaamuroni npakha moomaleloni elapo. ⁹ Yaale ankhala moothakoni ankokhorele, ni awanani ankhalihe ratta. ¹⁰ Mamwene ooTarsis ni n'makissiro anvahe tjootjanka, ni mamwene ooSaba ni ooSeba anvahe tjoovaha. ¹¹ Mamwene ooteene anokhorele, elapo tjooteene tjinkokhorele. ¹² Kontha yena nankhavihera oohikhalana, nkhuwela, ni oohuva, kontha khan'moona onkhavihera. ¹³ Yena nawoonela ekiriri oohuva ni oohikhalana, ninawoopola ekumi tjaatthu oothowiya. ¹⁴ Yena awoopola ekumi tjaatthu oohuvihatjiya, ephomiaayatja phiyoophwanela nmeethonimwawe. ¹⁵ Mwene akhale! Avahiye ewooru yooSaba. Atthu akhaleke anvekelelaka, ni Nluku anreerihe nihuku nooteene. ¹⁶ Elapo yovathi eruweriyeke tjinene, woomaleloni myaako, miritjaya tjiphuweke; n'hokorokhwaaya okhaleke phanka nri wooreera, ni atthu ovathi yintjiveke phanaka malassi on'mattani. ¹⁷ Ntjinanawe nikhaleke woohimala, ntjinanawe nikhaleke phanka ntjuwa; atthu anreeriheke ni elapo tjooteene amwiihaneke ooreerihiya. ¹⁸ Ootthapeliya akhale Apwiya Nluku, Nluku owiisrael, yooyo npanka miiriirya. ¹⁹ Ntjinanawe nikhale noottottopeliya woohimala, ni elapo yooteene etjare waaryawawe! Weekhweeli ni okhale tjitjon'mo! ²⁰ Mavekelo aDavi, mwaana Jesse, an'malela vaava.