¹ Kinahawootthawenlani, Apwiya; kihikhalakhale konihatjiyaka ehaaya. ² Nkikusse ni nkikhavihere mootthunaniwinhu; nkiviriyane ni nkoopole. ³ Nkhale mwalaaka nintthawenlwaaka, on'halaaka otthawelaka; n'huulumatja wiira koopoliye, kontha mwantthawenlwaaka ninlipiherwaaka. ⁴ Nkoople. Nlukwaaka, nmatatani mwaatthu oovavaryaa, nmatatani mwaatthu oohissariya ni owoopiha. ⁵ Kontha Nhu nkhuluvelwaaka, Apwiya. Kinawookhuluvelakani okhuma enamwaniaaka. ⁶ Okhuma nmirimani mwaanumwanaka, thinhu mwaakikhalenla; phinhu nkikumihale nmirimani mwaanumwanaka; kinaahala owiipelani woohimala. ⁷ Kinthoonhero waatthu entji; Nhu mwntthawenlwaaka woolipa. ⁸ Mwaanowaka tjin'hala otjara etjipotjinhu, nihuku nooteene ninttittimihweenhu. ⁹ N'hikikhotte wuuluvalawaka; n'hikitthawe ekurutjaka tjamala. ¹⁰ Kontha awananiaaa anaakuuluma; yaale an'wehaweha ekumiaaka aritji nkhayi. ¹¹ Nluku haahiya, ayenatja aniiratja, n'moomole ni nmwiive, kontha khaavotho oopheela omoopola. ¹² Nluku, n'wikihiye, Nlukwaaka, mwaakuvatje nkikhavihere! ¹³ Yoonihatjiye ehaaya yaale anpheelatja ekumyaaka; akhale ootthukelatjiya nootanhifwiya yaale ankipankela yootakhala. ¹⁴ Massi kin'hala owanriihani phinhu ni kinaahala owiipelani mahuku mentji. ¹⁵ Malakwaaka an'hala wuuluma essariyeenhu ni woopolawinhu nihuku nooteene, kinaahitjuwelelaru. ¹⁶ Kinaahala owa ni tjoovara tjokuru tjaaPwiya kin'hala wuulumela essariyeenhu, yawinhu paassi. ¹⁷ Nluku, n'naakissomihaka okhuma enanttonpyaaka; hata nen'nava kinaakhuwela tjoovaratjinhu tjomiiriirya. ¹⁸ Weekhweeli, nuuluvanlyaakan'na niikharari tjootteela, ooh Nluku, n'hikitthawe; wowiira kikhuwele ekurutjinhu nikhoto nikhwaawe, nooweryawinhu waatthu ooteene an'mwa. ¹⁹ Ooh Nluku tootho essariyeenhu, yuulupale tjinene! Nhu n'nopanka tjitthu tjuulupale, ooh Nluku, tupani owoolikan'nani? ²⁰ Nhu, nkoonihale mikatjamiho tjuulupale, n'naahala onun'wenliha, n'naahala onihokolossera nlaponi. ²¹ Mwintjenre eyuulupalyaaka ni mwaakulele ovukula. ²² Ni miivano kinaahala owiipelani niitjipo mwaha wonfentweenhu, Nlukwaaka; kinaahala owiipelani etjipo, ooh Israel ttakartiifu. ²³ Malakwaaka anaahala okhuwela nootteeliya kawiipelani etjipo, tjitjon'mo ninrimaaka, othanlaleenhu onaahala owiipelani. ²⁴ Ninliminaka ninaahala okhuwela essariyeenhu nihuku nooteene; kontha ahoonihatjiya ehaaya ni ari oopapharyaa yaale yaapheelatja ekumyaaka.