¹ Nkoopole, ooh Nluku, kontha maatji anaakutakutheeha ekumyaaka. ² Kinaaneela vowinssa, wahirivo nipuro noopheela weemela; kihophiya nipuro nowinssa, wahinkhwitiryaaka maatjaayo. ³ Kihootjyaa okhuwela; nmilwaaka ohuuma; meethwaaka ahotjara meethori omwanriiha Nluku. ⁴ Yaale ahinkipheela woohissariya ari entji woovikana ekharari tjon'murumwaka; yaale anpheela okiiva, akhanle awananiaaka, atthu okuru; kihaana kihokolossaka ehinýalyaaka. ⁵ Nluku, Nhu n'naatjuwela tjinvaraaka, etanpitjaka tjiri tjoohivithiya. ⁶ Wayaale an'wanriihani ahikhale owoonihatjiya ehaaya mwaha wawaka, Apwiya, aanakhotto; yaale anoorweelani ahihukhumwiye mwaha wawaka, Nluku owiisrael. ⁷ Mwaha wawinhu kinaavilela otthukeliya; ehaaya tjinaakhuneela ekhovyaaka. ⁸ Kinaatanhifwiya naassihimaaka, kintthu oohitjuwaniaa naassaana aanumwanka. ⁹ Kontha nfento ovapuwaniwinhu onkhalaka nimi. ¹⁰ Owakathi wnlalyaaka ni kitthukaka, ayenatja ahokiruwanatja. ¹¹ Waawaralyaaka ekuwo yossaakho, kaari etthu yootanhifwyaa waayenatja. ¹² Yaale anookoma nkhora muulupale oopooma yaahokuuluma; kiitjipo yaanan'hapaliya. ¹³ Mavekelwaaka ankhala awinhu, Apwiya. Owakathi on'haleenhu waakhenla, ooh Nluku wokiriinhu yuulupale, nkaakhule mootthunani ni woopolawinhu. ¹⁴ Nkoopole mwaawanani, nkitaphulatje mwayaale ahinkipheela ni nkikumihaka mowinssa momaatji. ¹⁵ Ekuru tjomaatji tjihikikusse, ni nlikitti nihikitthukele malakwaaya. ¹⁶ Nkaakhule Apwiya, nootthunawinhu ni waataanawinhu; kontha tjitji ekiriritjinhu tjinkipankeleenhu, nkiweele. ¹⁷ N'hivithe ekhoveenhu, kontha kihohuva. Nkaakhule wowaakuvyaa. ¹⁸ Nkaattamenle ni nkoopole. Mwaha waawananiaaka, nkoopole. ¹⁹ Nhu n'naatjuwela otthukeliyawaka, ehaatjaka ni ohikhalihiyawaka ntthu; awananiaaka ooteene ari ohoolowinhu. ²⁰ Otthukeliya onawooniha oweryaa nrimaaka, anaakilemela mahuviho. Kihonpheelatja ntthu aahala okivarenla, massi akinphwanhale; kihonpheelatja ookimaaliha, massi akinphwanhale. ²¹ Kaahovahiya eveneenu phanka yooliya; wan'miloniwaka, ayenatja ahokivaha yoonhuunha wiira kiwurye. ²² Meetjaaya akhale nryankho; yoonaka toko ari ratta, yamore. ²³ Meethwaaya akhale ooripela wiira ahoone; mithanatjaya tjaathukumeleke. ²⁴ Mwakurusselatje maatji, orussiyawinhu waaphwanhatje. ²⁵ Maprwaaya akwanhulatjiye; hikhale ntthu n'hala okhala n'heemaniwawe. ²⁶ Kontha ayenatja ahomoomolatja yoole nrakalihaleenhu; ayenatja anonkhuwela ntthu moonihaleenhu oweryaa. ²⁷ Mwaakhalihe oovara tjitthu tjotakhala ni tjoonhala; n'haahiye atthemaka moolamulaniwinhu. ²⁸ Akhale ookumihiya nliivuruni yeekumi ni ahantikhiye vamotja naanassariya. ²⁹ Massi kiri oohuva ni ootjukula, woopolawinhu, ooh Nluku, okikusse nipuro noorekama. ³⁰ Kinaahala otthapela ntjina naNluku niitjipo ni kinaahala onttittimiha niitjipo tjomahala. ³¹ Enaahala waatjivela Apwiya tjinene woovirikana emope wala enama yonhaka. ³² Atthu anaahala woona ni anaahala otteeliya; nhu n'noorweela Nluku, nkhale oolipa mirima. ³³ Kontha Apwiya anawiiwa oohuwa ni khaanaatanhifu ootthukiya. ³⁴ Etthaya niirimu enttottopele, epahari ni tjooteene tjirivo. ³⁵ Kontha Nluku naahala ovussavussera epooma tjolapo yooJuda; atthu anaahala okhala. ³⁶ An'hakhalayi aanantekwaaya phan'hala ohalana; ni yaale anfenta ntjinanaya phan'hala okhala.