¹ Nluku akhale oovuwa ni awananiaawe akhale ookawaniaatja; atthawe ohoolowawe yaale anonthanha. ² Phanka mwiissi, aveverussiye; akhale ootulussiya phanka etthu yootothwaa wamooroni, atthu oovavaryaa akhale oorimeela ohoolo waNluku. ³ Massi anassariya akhaleke ootthapa; atthapeke ohoolo waNluku! Atthapeke ni ahakalaleke! ⁴ N'mwiipileke Nluku, mwiipeke etjipo mwantjinanawe. N'mwiipeleke yoole neetta vatjulu maatji omuro Jordao. Apwiya ntjinanaya; ntthapeke ohoolowaya! ⁵ Athumwaane assaana oohaathumwaane ni nphuki anankhweli Nluku eettakattiifu wankhalaawe. ⁶ Nluku nawaakhavihera yaale ahinoomutji; Yena nawaatthukula anantthukiya, massi atakhali ankhala watthayani yowuuma. ⁷ Nluku, waarwaaleenhu ohoolo waatthweenhu, weettaleenhu moothakoni, ⁸ etthaya yaahottetemela; erimu yaahomwaressa epula ohoolo waNluku, Sinai aahottettemela ohoolo waNluku, Nluku owiisrael. ⁹ Ooh Nluku, n'hokurussa epula yuulupale; etthayeenhu ehokhala yooruwerya. ¹⁰ Atthweenhu ahokhala mon'mo; ooh Nluku massikhini n'honvaha otthunawinhu. ¹¹ Apwiya n'hovaha nkhikitjero ni nphwinko muulupale waanakhotto waahohimyatja. ¹² Mamwene aanakhotto anaatthawatja. Ayenatja anaatthawatja ni athiyana ananriihana owaani akawanatje mihakhu: ekhuntta tjomapupha oparatha, niwooru yossafarawu. ¹³ Nhu mwaahalatjale muntjitjini, npankenleni tjon'mo? ¹⁴ Oowerya tjooteene haamwaressatja mamwene vaavale. Aari phanka kuussi omwaako Zalmom. ¹⁵ Mwaako waNluku mwaako Basa; mwaako woorekama mwaako Basa. ¹⁶ Kontha n'noweha ninttima, nhu, ooh atthu onmwaakoni, womwaako Nluku onpheelaawe okhala? Weekhweeli, Apwiya anaahala okhala niyena npakha khalayi. ¹⁷ Mikukuttha tjaNluku tjohaalikelyaa, ekonto ekontotjene; Apwiya ari naayenatja nipuro ttakattiifu, phanka oSinai. ¹⁸ Nhu n'howela otjulu; n'haakussa anantthukiya; n'haakhela tjoovahiya tjaatthu, npakha wayaale anoowananani, wiira akhale vaavale, ooh Apwiya Nluku. ¹⁹ Oottottpeliya akhale Apwiya ankussa mirinttitjihu, mahuku ooteene, Nluku moopoliihu. ²⁰ Nlukweehu Nluku noopola; Apwiya, yaayo paassi phanphwanela onoopola mookhwani. ²¹ Weekhweeli, Nluku naahala waahonona murutjaya awananiaawe, yaale aneetta antarawatjaka. ²² Apwiya ahiira: Kinaahala waahokolossa awananiaaka oBasa; kinaahala waahokolossa mowinssa mopahari, ²³ wiira waassile, oruwyaaka enhaatjaa nphomeniwaya, tjitjon'mo phanka malimi olapwatjaya anaahala okhalana nipuronaya nphomeni mwaawananiaaya. ²⁴ Ayenatja an'nowehaka nphwinkweenhu waatthu, ooh Nluku, nphwinko waNlukwaaka, athumwanaka, amweniaaka, wonipuro ttakattiifu. ²⁵ Anamwiipa yaahohoolela, woottharenlana anamoopa ni, eriyari, assithiyana oohitheliya yoopaka ekoma. ²⁶ Munttottopeleke Nluku mwaatthuni; mwiipele Apwiya, nhu nri atthu owiisrael. ²⁷ Owantjera awe Benjamim, ooyevessa nmalokoni, vano, ahooleli aJuda naatthwaaya, ahooleli aZebulom ni ahooleli aNaftali. ²⁸ Nlukwaa, Israel, aaholamula ekurweenhu; n'nithoonhere oweryawinhu, ooh Nluku, phanka tjooniheraleenhu mahuku avirale. ²⁹ N'noonihere oweryawinhu npaaniwinhu, oJerusalem, onwiiheriyeenhu tjoovahiya. ³⁰ Nkhuwele enama tjuulupale okhottoni, naatthu, atthwaale niinamatjaya. Yoowiihatjereni tjoovaha; mwaamwaressatje atthu anfenta ekhotto. ³¹ Akhulupale anahala owa akhumaka wiigiipitu; atthu oweetioopiya anaahala waakuvatja wiira ataphule matataaya waNluku. ³² N'mwiipele Nluku, nhu ahooleli onlaponi; mwiipele etjipo Apwiya! ³³ Yaale ankhala wiirimu, arivo okhumamahuku okhalayi; nkawehani, ayena anaavussa ntjuunaya noowerya! ³⁴ Munvaheke ekuru Nluku; oweryawaya ori ni Israel ni ekurutjaya tjiri wiirimu. ³⁵ Nluku, phinhu owooviya nipironinhu ttakattiifu; Nluku owiisrael, yena nawaavaha owerya niikuru atthwaawe. Oottottopeliya akhale Nluku!