¹ Nluku, Nhu mwaNlukwaaka! Kinawoopheelatjani woohimala; nrimaaka ori nintthonaninhu. Erutthwaaka enawoopheelatjani ntthayani yowuuma ni yowootjyaa, nipur nihirivo maatji. ² Vano kaahoowehani npaani womavekelo, wiira kiwehe ekurweenhu niwaaryawinhu. ³ Nfentweenhu phunphwanela ovirikana ekumi; phimaana, matteryaaka anaahala owiipelani. ⁴ Kinaahala woottottopelani kakhala nkumi; mwantjinaninhu kinaahala ovussa matataaka. ⁵ Nrimaaka onaahala otteeliya onvikana ntthu oolya eyoolya yontjivela; noohakalala, malakwaaka anaahala wootthapelani, ⁶ kakhala owuupuwelani kirupaka niwoovekelani ohiyu wooteene. ⁷ Kontha Nhu mwankhaviherwaaka, ni muntthuutjini womapupheenhu kinaatthapa. ⁸ Nrimaaka onkhala niNhu; moonueenhu woolopwana onaakikhuneela. ⁹ Massi yaale anpheela okumiha ekumyaaka anaahala omorela moomaleloni elapo. ¹⁰ Ayenatja an'hala ovahenratjiya mooweryani wokatana ni an'hala olyaatja etjoolya tjontakwaani. ¹¹ Massi mwene naahala ohakalala waNluku; ooteene anluphela ntjinanawe anaahala otteeliya; massi makwaaya yaale anuuluma tjowootha anaahala otthukiya.