¹ MwaNluku paassi nrimaaka onanriiha okhala oomaala, kontha waayena phun'wa woopwaawaka. ² Ayena paassi phimwalaaka ni woopwaawaka; Ayena nlipiherwaaka ni akin'hala omora. ³ N'nohala omoomolaniha ntthu wiira n'mwiive , phanka eluwani yowooroma wala yopheela omora npakha eyaakhani? ⁴ Ayenatja anuupuwela enan'na yoopheela omwiiva nimakhalelwaawe ooreera, ni anfenta ottonka tjowootha; anuuluma tjootakhala nimalakwaayaayo, massi mirimatjaya tjuulumaka tjootakhala. ⁵ MwaNluku paassi onanriiha okhala oomaala, kontha wanriihawaka ossunkiye wayena. ⁶ Ayena paassi phimwalaaka niwoopwaawaka; Ayena phinlipiherwaaka. Ni akin'hala omora! ⁷ MwaNluku phuri woopwawaka ninttittimihwaaka; Nluku nlipiherwaaka woolipa nintthawenlwaaka. ⁸ Mwaakhuluvele ayena owakathi wooteene, ooh atthu, mwaavahenre ohoolowaya mirimatjinhu tjooteene. Nluku ntthawenlweehu. ⁹ Weekhweeli atthu owiiyeviha ari phanka ephyoo, ni atthu owiitjuunuwiha, wootha; ayenatja an'hala wooniya elemelelwaaya wanphimoni; nkookhala oovenwa phanka ephyoo. ¹⁰ N'hikhuluvele mwatjoopakatja wala ovatinhu. N'hiweheehe mihakhu, kontha tjen'nho khatjin'hala owaana mihokorokho; n'hihele wanrimaniwinhu. ¹¹ Nihuku nimotja Nluku aahuuluma, kihiia emaara piili: ekuru phitjaNluku. ¹² Apwiya, otthuna niwaataana wawinhu, kontha khula ntthu n'novaha wonayeeli mitekotjawe.