¹ Ooh Nluku, Nhu n'noonikhotta ni n'hokussa mwaakiherotjihu; n'naarussiyaka. N'noopoletho! ² N'hoottettemeliha etthaya, ni n'haatthukulela; n'wehe essiritjaya, kontha enaattetemela. ³ Nhu n'haahaawiha atthweenhu; n'honiwuriha nipha. ⁴ Nhu n'haavaha nthoonhero yaale anoottittimihani, ethoonheriye mwaha wokhweeli. ⁵ Wowiira yaale anaafenteenhu akhale ootaphuwatja, n'noopole nintataninhu noolopwana ni nkaakhule. ⁶ Nluku huuluma niikurwaaya: Kinaahala otteeliya; kinaahala onkawaniha Siquem ni okawaniha Sucote. ⁷ Gileade awaka, Manasses awaka ; Efraim nkhuneelwaaka, ni Juda nkhaviherwaaka. ⁸ Moabe ereerelwaaka yookattha; wa Edon kinaaha orula etjapatthotjaka; oFilistia kinaahala okhuwela wootthema. ⁹ Tupani n'hala okikussa epooma yoolipihatjiya? Tupani n'hala okirweeha oEdom? ¹⁰ Khan'nakhala Nhu, ooh Nluku, n'nikhottale? Nhu khan'norwaaka naanakhottweehu okhottoni. ¹¹ N'nikhavihere mwaha wan'wanani, kontha nkhavihero wantthu khunanteko. ¹² Ninaahala otthema ninkhavihero waNluku; Ayena anaahala waanhakela awananiihu.