¹ Nkoopole mwaawananiaaka, Nlukwaaka; nkoopole wayaale ankittharatthra. ² Nkoopole wayaale ankipanka yootakhala ni nkoopole waatthu anvara tjoonhala. ³ Kontha ayenatja ankanriihatja wiira akiive. Atthu oolipa anaakithukumanela, massi kahi mwaha watjoovaratjaka wala etanpitjaka, Apwiya. ⁴ Ayenatja aniitthonkomaniha wiira akiive, kinoohivararu etthu. Nvuwe, n'wehe ni nkoopole! ⁵ Nhu, Apwiya, Nluku aanakhotto, Nluku owiisrael, nvuwe ni mwaahukhumu atthu ooteene; n'himoonele ekiriri hata n'motja oorimeela. ⁶ Ayenatja an'hokolyaa oniilale, ankhuwatja phanka elapwa woorukureerya epooma. ⁷ Nkawehani, ayenatja anoopopiha nimalakwaaya; nimatteryaaya ari phanka ekatana, kontha aniira: Tupani n'hala oniiwenla? ⁸ Massi Nhu, Apwiya, mwaathyaatje. Nhu n'nathyaa elapo tjooteene. ⁹ Nluku ekurwaaka, kinaahala owanriihani; Nhu n'naakikhavihera tjinene! ¹⁰ Massi Nluku naahala okiphwanha ninfentwaawe wokhweeli; Nluku naahala okithoonhihera enpheelaaka mwaawananiaaka. ¹¹ N'hiwiivatje, wala atthwaaka anaahala wiiliyala. Mwaamorihatje, Apwiya, mwinkitthweehu. ¹² Mwaha wotanpi tjomwaanomwaya ni mwaha womoolumo onmattereniwaya, akhale oovarakatjiya ni watjootakhala ni tjowootha tjinuulumaaya. ¹³ Mwaamwaressatje noorussiya, mwaamwaressatje wahinooniaayatho; wiira atjuwelatje wiira Nluku n'hoolela oJaco npakha woomaleloni wolapo. ¹⁴ Yootjootjilo, ayenatja phun'hokolyaaya, akhuwaka phanka elapwa ni woorukureerya epooma. ¹⁵ Ayenatja aneetta atholaka eyoolya ni, yeehivonatjeke, phun'nhakulatjaaya. ¹⁶ Watjooteene, inaahala wiipa niikurweenhu, ni owitjissu kinaahala wiipa mwaha wonfentweenhu muulupale! Kontha Nhu mwankhaviherwaaka ni ntthawenlwaaka nihuku nin'huvaaka. ¹⁷ Mweekurwaaka, kinaahala owiipelani etjipo, kontha Nluku nlipiherwaaka, Nluku onfento wokhweeli.