¹ Nkoonele ekiriri, ooh Nluku, atthu aniira akoonihaka oweryaa; yaale ankiwanana ni ankihuviha. ² Awananiaaka an'mananiha okitankula nihuku nooteene; kontha ahaavo entji, ankiwanana. ³ Massi kakhalana woova, kinaahala woohuluvelani. ⁴ Mwanluku, ninuulumo kinaatthapa, mwanluku kihaana nkhuluvelo ni akin'hala woova; ntthu paassi aahala okipankani? ⁵ Nihuku nooteene ayenatja anaatanhifu moolumwaaka; wuupuwelawaya wooteene woopheela okipanka yootakhala. ⁶ Anaathukumana, anawiipithatja, ni anaaweha meettelwaaka, akanriihaka wiira akiive. ⁷ N'haahiye atthu oopanka tjootakhala. Mwaamwaresse atthu moorussiyaniwinhu, ooh Nluku. ⁸ Nhu n'hottonka tjoovaratjaka ni meethoryaaka n'heessa wanipuroniwinhu; khatjiri nliivurunimwinhu? ⁹ Awananiaaka anaahala otthawa nihuku nin'halaaka wookhuwelani; phintjuwelaaka: wiira Apwiya phaawaka. ¹⁰ Mwanluku, ninuulumo kinaatthapa, mwaapwiya, ninuulumo kinaatthapa, ¹¹ mwanluku kihaana nkhuluvelo i akin'hala woova; ntthu paassi aahala okiirihani? ¹² Kihaana kivirihaka nkhuluvelo opankalyaaka, ooh Nluku; kinaahala woovahani tjomahala. ¹³ Kontha Nnhu n'hokumiha ekumyaaka mookhwani; Nhu n'hossunka enhaatjaka mowoopiha, wiira keette wanluku munthukoni mwaatthu akumi.