¹ Mwiiwe mavekelwaaka, ooh Nluku, ni n'hiivithe womavekelwaaka. ² Nkiviriyane ni nkaakhule; akinoomumula womikatjamihotjaka, mwaha womatju aawananiaaka, ³ mwaha watjoovara tjaatthu ootakhala; kontha ayenatja ankiwiiheratja mikatjamiho ni, noorussiya, anaakoomolaniha. ⁴ Wattheremani, nrimaaka onaakutakuthyaa, ni atakhali owookhwani ahokimorela. ⁵ Woova noottettemela ohokiweela; missankiho tjinaakiweela woomalela. ⁶ Mi kaahiira: Ooh, kaarina mapupha phanka ekhuntta, kaanaavava nphakha ophwanha nipuro noomumula! ⁷ Kaanaarwaa ottayi ni kaanaakhala woothakoni. ⁸ Kaanawaakuvatja wiira kirwee n'nikhukuni ottayi wophyoo ni kuussi. ⁹ Mwaakwanhulatje, Apwiya, wuulutjawaya, kontha kin'noonaka tjinpankakaaya tjootakhala noonhakulihana npooma. ¹⁰ Othana noohiyu ayenatja aneettela tjoovaratjaya; tjoonhala moolumo oohikhala ari n'hinamwaya. ¹¹ Yootakhala eri eriyaryaaya; wootha ni wuulumatja pussya ori munttalaniwaya. ¹² Khanakhala n'wanani nkihoolela, kaanaavilela; wala yoole hinkipheela, kontha wayooyo kaanaahala wiipitha. ¹³ Massi phiwe, ntthu oolikana nimiivano, nmweettanaaka ninpwanaaka owanrimani. ¹⁴ Naahaataana ventji; naarwaa nkhayi enupa yaNluku, naatthu. ¹⁵ Nookhwe aaphwanhatje woowaakuvyaa; akele nkhapureni akumi, kontha yootakhala eri nipuro ninkhalaaya, eriyaryaayatja. ¹⁶ Kinaahala onlepela Nluku, ni Apwiya anaahala okoopola. ¹⁷ Yootjootjilo, yoowitjissu ni ohiyu eriyari kinaahala wiihiya noothamala, ni Ayena anaahala wiiwa ntjuunaka. ¹⁸ Ayena, ninlipihero, anaahala okumiha ekumyaaka nkhottoni, kontha ookiwananaayo entji. ¹⁹ Nluku, yoole n'hoolela okhuma woopatjeroni, naahala wiiwa ni naahala waakhula. Kontha ayenatja khanrukunussa makhalelwaaya ni khan'moova Nluku. ²⁰ Npwanaaka haarukuwela yaale yaakhala ninrettele niyena, hihissimwaka yuulumatjalyaawe. ²¹ Malakwaawe yaari owoolwaa phanka manteeka, massi nrimaawe waari wowoopiha; moolumwaawe yaari oovevyaala woovirikana makhura oonukhela, massi, weekhweeli, yaari phanka ekatana tjookumihiya mwaaryaaya. ²² Mwaavahenre Apwiya tjitthu tjootossaleni, ni Ayena anaahala wookhaviherani; Ayena khan'hala otthuniha wiira nassariya arimeele. ²³ Massi Nhu, Nluku, n'naahala waawaana atakhali munlikittini mokwanhuwatja; atthu atakhali ni owootha khan'hala okhala wala vakaani woovirikana naatkhwaaya. Massi mi kinaahala wookhuluvelani.