¹ Nkoonele ekiri, ooh Nluku, mwaha wonfentweenhu wokhweeli; mwaha wonfento wokiriritjinhu tjintji, tjinaattikittha mikatjamihotjaka. ² Nkirapihe woomalela tjoopakatjaka ni nkireerihe etanpitjaka. ³ Kontha kinatjuwela mikatjamihotjaka, ni etanpyaaka eri ohoolowaka. ⁴ Kihoovarelani yootakhala ohoolowinhu, weenan'na yossariya muulumaka, ni n'naaphuka ratta. ⁵ Kiyariye ntanpini; ntanpini anumwanaka yaahokirupala. ⁶ Nhu n'nopheela ekhweeli wanrimaniwaka, ni wanrimani n'nokissomiha otjuwelatja. ⁷ Nkirapihe ninreerelo ni kinaahala okhala ooreera, kinaahala okhala ootteela tjinene. ⁸ Nkikhalihe owiiwa wootteeliya wowiira makhuva ahon'naleenhu atthapeke. ⁹ Nvithe ekhoveenhu mwaha wotanpitjaka ni nfutte tjoovaratjaka tjooteene. ¹⁰ Nkhalihe wami, ooh Nluku, nrima wooreera, nkiwiihere n'nepa wooreera. ¹¹ N'hikirihele ottayi, ni n'hikumihe n'nepeenhu ttakattiifu waryaaka. ¹² Nkihakalalihe nmoopwaaniwinhu, ni nkivahe n'nepa woopheela wiiwelela. ¹³ Vano kinaahala waassomiha anamakossa mittalatjinhu, ni anatanpi anaahala wooweelani. ¹⁴ Nkilevenle mwaha woomwaressa ephome, Nluku owoopwaawaka, nimi kinaahala okhuwela mwaha wossariyeenhu. ¹⁵ Apwiya, ntthukule matteryaaka, ni malakwaaka anaahala wookhuwelani. ¹⁶ Kontha Nhu khatjinootjivelani tjoovahiya, kaanaahala woovahani; Nhu khanrina etthunelo tjookuttho. ¹⁷ Tjoovaha tjinontjivela Nluku n'nepa wowiiyeviha; nrima wowiiyeviha khamun'hala otanhifu, ooh Nluku. ¹⁸ Npanke yooreera oSiao, wonayeeli nootthunawinhu; nvussavussere eluwani yoJerusalem. ¹⁹ Vano Nhu n'naahala ottapenla tjoovahiya tjossariya, tjoovahiya tjoopahiya nookuttho; ni atthweehu anaahala ovaha enama waaltaare.