¹ Nviriyane okhuwelawaka, Apwiya, mwiwe waapawaka. ² Mwiiwe okhuwelawaka, mwenyaaka ni Nlukwaaka, kontha kinoovekelani Nhu. ³ Apwiya, owitjissu, Nhu mun'niiwa wunlawaka; owitjissu, kin'noowiiherani tjoolepelatjaka ni kin'nanriiha ninkhuluvelo. ⁴ Weekhweeli, Nhu mwaNluku n'hinlawiha yootakhala; nvara yootakhala khan'hala okhala ninhu. ⁵ Ntthu oohanhuriha khan'hala okhala wariinhu; Nhu wookassirini muupuwelelo oohiloka; ⁶ Nhu n'nawaakwanhulatja atthu owootha; Apwiya anawaatanhifu atthu anvara tjootakhala nintthu nlolo. ⁷ Mwaha wonfentweenhu, kinaahala okela npaaniwinhu, ni kinaahala okokhora enupeenhu ttakattiifu. ⁸ Apwiya nkeettihere nssariyanimwinhu mwaha waawananyaaka; mookolole nttaleenhu ohoolowaka. ⁹ Khiivo ekhweeli mwaano mwaatthu ankoomolaniha; mwaanomwaya mootakhala, mimilotjaya tjiri phanka mahiye ootthukuwa, aniittottopa nimoolumwaaya. ¹⁰ Nluku waamorihele mootakhala! Moomolatje mwaha wotanpitjaya tjintji, kontha aholipa wanhu. ¹¹ Phimaana, atteeliyeke yaale ooteene anootthawenlani, mwaahiye akhuweleke niitjipotjaya kontha mun'naakhavihera; mwaahiye yootthapelekeni ooteene anfenta ntjinaninhu. ¹² Kontha Nhu, Apwia n'nanreeriha nassariya, phanka mwaakiho, n'nanrukureerya niissontteenhu.