¹ Apwiya, n'hikitthukele noorussiyawinhu wala n'hikihiye nookassiriyawinhu. ² Nkoonele ekiriri, Apwiya, kontha kintthu ootteetthyaa. Nkivonihe, Apwiya, kontha makhuvaaka aneera attettemelaka. ³ Erohwaaka ehokutakuthyaa ventji. Apwiya, kin'hala okhala tjo npakha eyaakhani? ⁴ N'kihokoleele, Apwiya, ni n'kikusse! Nkoopole mwaha wonfentweenhu wokhweeli! ⁵ Kontha, mookhwani, khuuvo owuupuwenlani. Nkhapureni, tupani n'hala woovuwihani? ⁶ Kihootjyaa wunlawaka; khula ohiyu, nkoryaaka onaanaana nimeethori, owiithowaka kinrapiha niyaayo. ⁷ Meethwaaka anripela nootjukulatja; meethwaakaayo antteetthyaatja mwaha waawananyaaka. ⁸ Nkihuluwatje, ooteenetjinhu n'novara tjootakhala, kontha Apwiya anawiiwaka wunlawaka. ⁹ Apwiya ahiiwa yuulumalyaaka niikiriri; Apwiya ahotthuna mavekelwaaka. ¹⁰ Awananyaaka ooteene ahoonatja ehaaya. Ayenatja anaahala otanhifwatjiya ni anaahala ohuluwatja wowaakuvyaatja.