¹ Mwiiwe, nhu, atthu ooteene; nviriyane, nhu, ooteene n'nokhala nlaponi, ² khula enan'na yaatthu, athaatjiri naamassikhini. ³ Malakwaaka an'hala wuulumatja nootjuwelatja, ni yoovara yowanrimaniwaka en'hala okhala i wiiwelela. ⁴ Kinaahala oreryaa maarwaaka wonlikanihero, kin'hala ohatjula ntekwaaka niitjipo. ⁵ Kontha kin'hala woovelani mahukwaaka, tjoovaratjaka tjinakiphiyale npakha nhaani? ⁶ Kin'hala owoovelani ankhuluvela mihakhutjaya ni yiittottopa nitjitthutjaya? ⁷ Ekhweeli wiira khaavo ntthu npheela on'nholiha Nluku wiira mwaamun'nawe hikhwe, ⁸ kontha ekumi yantthu orika ni khaavo npheela oliva tjiryeehu. ⁹ Khaavo npheela okhala mahuku ooteene, wowiira hikhwe, ¹⁰ maana naahala okhwa woomalela. Atthu ootjuwelatja anaakhwa; ntthu ohitjuwela tootho anaakhalana ni anaahiya mihakhutjaya yaahiyeraka akhwaaya. ¹¹ N'muupuwelelonimwaya, amutjaaya anaahala okhala mahuku ooteene ni mapuro ankhalaaya an'hala okhala womakhoto ooteene. Ayenatja anvaha matjina elapotjaya. ¹² Massi, hata akhalanaka mihakhu, ntthu khankhala mahuku ooteene; yena nkhala phanka tjitthu tjinrimeela. ¹³ Nttalaaya phuurimeelawaya; hata tjitjon'mo, atthu anontthara anaakupaleela en'himyatjaaya. ¹⁴ Phanka enama, ayenatja anrweehelatjiya okhapure, okhwa phunkookhala nkukhulyaaya; anassariya anaahala okhalana ekuru waayenatja owitjissu, niirutthutjaya tjin'hala okhala nkhapureni, woohinipuro noopheela okhala. ¹⁵ Massi Nluku naahala okumiha ekumyaaka nkhapure. Ayena anaahala okikussa. ¹⁶ N'hoove ntthu akhala thaatjiri, tjintjiva mihakhu vapuwaniwawe, ¹⁷ kontha, akhwavale, khiivo en'halaawe okussa; khiivo en'halaawe okussa akhwavale. ¹⁸ Yena aaniittottopela waaryaawe nkumi; ni atthu anawoottottopelani mwiikhalakavale; ¹⁹ yena n'hala otakaneela ni nikhoto nan'nathumwanawe ni khan'hala woonatho nthuko. ²⁰ Yoole rina n'hakhu, massi kharina wiiwelela, onkhala phanka etthu yoorimeela.