¹ Apwiya phoolupale, phanphwanela ottottopeliya npooma mwaNlukweehu, mwantjinanaya ttakattiifu. ² Ooreera ni oorekama, nootteeliya elapo yooteene, mwaako Siao, wonphantte onkhuma ntjuwa, epooma yamwene muulupale. ³ Nluku hiitjuweliha n'mapaanimwawe, phanka ntthawelelo. ⁴ Nkawehani, mamwene ahothukumana ni nkhayi ahovira. ⁵ Wawehatjalyaaya, yaahotteeliya ni, yaahokutakuthyaa, yaahotthawa wowaakuvyaatja. ⁶ Waahaaphwanhatja woova; yaahoona oweryaa phanka athiyana yeeyaraka. ⁷ Niiphyoo yuulupale Nhu n'haakwanhulatja anaviyu oTarsis. ⁸ Phanka tjiiwaleehu, tjitjon'mo nin'noonaka opooma yaaPwiya aanakhotto, epooma yaNlukweehu; Nluku naakhavihera woohimala. ⁹ Nin'neettihera nfentweenhu wokhweeli, ooh Nluku, eriyari wonupeenhu. ¹⁰ Tjitjon'mo phanka ntjinaninhu, Nluku, n'nemaninhu nihaavo npakha omaleloni wolapo. Ntataninhu noolopwana ninootjara n'nema. ¹¹ Mwaako Siao otteeliye, assaana ooJuda atthapeke mwaha wokettelotjinhu tjossariya. ¹² Mweette woorukureerya mwaako Siao, mweette woorukureerya, mwaalikele ekhalelotjaya, ¹³ n'weheehe ratta ekhalelotjaya niinupatjaya, wiira mwaattonkeleke atthu an'hala owa. ¹⁴ Kontha Nlukuula Nlukweehu omahuku ooteene ni oohimala. Ayena an'hala okhala mweettiherweehu npakha wookhwani.