Ekapiitulo 47
1
Moope ekuphi, atth ooteene; ntthapeke, n'muupuwenlaka Nluku nintju nootthema.
2
Kontha Apwiya, owiirimu, phinooviya! Ayena amwene oolupale elapo yooteene.
3
Ayena anaaniihanela atthu, naatthu n'nhaanimwihu.
4
Ayena ahonithalenla yoohalana, waarya wa Jaco, Ayena nfentalyaaya.
5
Nluku howela eriyari wookhuwela, Apwiya yaahorwaa ohoolo nintju nomapenka.
6
N'mwiipeleke etjipo Nluku, mwiipeke etjipo! Mwiipeleke etjipo amweneehu, mwiipeleke etjipo!
7
Kontha Nluku Mwene elapo yooteene; mwiipeke etjipo nootjuwelatja.
8
Nluku nawaahoolela atthu; Nluku nookoma weehitjeni ttakattiifu.
9
Akhulupale aatthu ahothukumana mwaatthu aNluku aAbraao, kontha mamwene onlaponi phaNluku. Ayena phinttottopelo muulupale!