¹ Nrimaaka oneetta nimoolumo ooreera. Kinaahala okhuwela ventji moolumo yantikhalyaaka mwaha waaMwene; nliminaka niri phanka mwantikho amayowantikha. ² Nhu mwanassariya oovirikana naassaana aatthu; mahala ankhuma nmalakuniwinhu. Phimaana, nihotjuwela wiira Nluku hooreerihani woohimala. ³ Ntthonkomanihe ekataneenhu, ooh oowerya tjooteene, ni waaryawinhu. ⁴ Otthunawinhu, mikukuttha tjowootthemani, mwaha weekhweeliinhu, nfento niissariya; Ntataninhu nossariya ninaahala woossomihani tjitthu tjowoopiha. ⁵ Mattheereenhu ari oothonkoliya; atthu ankhala awaaka wariinhu; Mattheereenhu ari wanrimani womamwene awanani. ⁶ Ehitjeenhu, ooh Nluku, phiyomahuku ooteene ni oohimala; ohoolela wossariya ohoolela weemeneenhu. ⁷ Nhu n'hofenta essariya ni n'hotanhifu yootakhala; phimaana, Nluku, Nlukweenhu, hoottapelani nimakhura ootthapeliya oovirikana naassikhwiinhu. ⁸ Ekuwotjinhu tjooteene tjinaanukhela, aloe ni cassia; ota wonupa tjooreerihiya, ereerelo tjomikhoyi tjinawootteelihakani. ⁹ Assaana omamwene ari naathiyana onttittimihweenhu; ntataninhu noolopwana yookomale apwiya mwene, anawarale ewooru ya Ofir. ¹⁰ Okiiwe, mwaamwanaka, waaliyale atthwaa niitthoko yaathumwanaa. ¹¹ Weenan'na yeela Mwene naahala woopheela; Ayena Apwiyaa, waaviriyane. ¹² Mwaana aTiro n'hala okhala woowu niitthuvo; athaatjiri eriyari waatthu anaahala wooweha. ¹³ Mwaana okhweeli onupa yooreerihiya phooreera; tjoowaratjawe tjowooru. ¹⁴ Yena n'hala orwaaniya waamwene ni tjoowara tjoottotthiya; mimyaaruussi, assikhwaaya, anaahala waatthara; n'naahala owiihariya. ¹⁵ Ayena an'hla owaaniya moohakalalani nootthapa, ni anaahala okela enupa yaamwene. ¹⁶ Nipuro nan'nathumwana, an'hala okhala assaanaa, on'hala waakhaliha ahooleli elapo yooteene. ¹⁷ Kinaahala wuupuweliya ntjinaninhu makhoto ooteene; phimaana, atthweenhu anaahala woovahani mahala omahuku ooteene ni oohimala.