¹ Ni maarweehu, ooh Nluku, nihiiwa an'hakhalayi anittonkelaka tjavareenhu mahukweenhu, mahuku okhalayi. ² Nintataninhu, n'hoomola elapo tjintji, wiira mwaale atthweenhu; Nhu n'hoomolatja atthu ni n'haamwaressela atthweehu elapwaayatja. ³ Kontha ayenatja khaaphwanhatjale elapo mwaha wokatanatjaya, wala khatjiwoopolale myoonotjaya, massi, mwaha wontataninhu noolopwana, mwaha womoonweenhu ni mwaha wonthukweenhu woowiithowinhu, mwaha wonfentweenhu. ⁴ Nhu mwaaMwenyaaka, ooh Nluku; nkurussele otthema wa Jaco! ⁵ Mwaha wanhu, ninaahala waatthema awananiihu; mwaha wontjinaninhu, ninaahala waanhakela yaale an'hala onikhumenla. ⁶ Kontha akin'hala okhuluvela nrekonaka, wala ekatanaaka khin'hala okoopola. ⁷ Massi Nhu n'honoopola mwaawananieehu, ni n'hooniha ehaaya yaale an'nithanha. ⁸ MwaNluku, ninaatthapa nihuku nooteene, ni ninhaala ovaha mwahala ntjinanaya mahuku ooteene. ⁹ Massi n'nava n'honihiya, ni khan'naaveleela anakhottweehu. ¹⁰ Nhu n'hinihiya nintthawaka n'wananiihu; ni yaale an'nithanha ahonitthema. ¹¹ Nhu n'hivahale phanka enama tjoopheela ohitiya, ni n'honikawaniha n'malaponi. ¹² Nhu n'haatumiha atthweenhu woohiitthu, ni wala mwaha woyeeyo n'hakhweenhu khawintjenryaale. ¹³ Nhu n'nipankale etthu yohaaya waamwaattaman'nweehu, nihotanhifwiya noothanihya naatthu ahin'nipheela. ¹⁴ Nhu n'honiruwaniiha naatthu; naatthu niniira nooniya naatthu ottikinhiyaka muru ¹⁵ Otanhifwiyawaka oniira okhalaka ohoolowaka ni ehaaya ehokikhuneela owiithowaka, mwaha wontju ninveeha ni ninruwana, ¹⁶ mwaha won'wanani ni ntakhali. ¹⁷ Tjihoniweela tjooteene, waariihu nihinooliyalani wala ninatanhifwale waataanawinhu. ¹⁸ Nrimeehu khuhokoleelale ottuli; weettawihu khuhiyale nttaleenhu. ¹⁹ Massi, Nhu n'honissiliiha nimwalapwa ni n'honikhuneela nintthuutji owuukhwani. ²⁰ Ninaliyanle ntjina naNlukweehu, wala ninataphunle matateehu wanluku oohikhala, ²¹ Nluku khaahala otjuwela? Kontha Ayen anaatjuwela essiiri tjowanrimani. ²² Weekhweeli, mwaha waawinhu nihovahenriya wookhwani nihuku ooteene; ninkhalihiya phanka enama tjoopheela ohitiya. ²³ Nkavuwani! N'norupelani, Apwiya? Nvuwe, n'hinihiye womahuku ooteene. ²⁴ N'niipithelani ni n'niliyalaka ni mahuvihweehu? ²⁵ Ninaapapatthenliya npakha vathi; erutthutjihu tjiri vathi. ²⁶ Nvuwe n'nikhavihere! N'noopole mwaha wonfentweenhu wokhweeli.