¹ Ooreeriya phuule nonkutakuthyeela oohaawa. Nihuku nomahuviho, Apwiya anaahala omoopola. ² Apwiya anaahala onkhavihera nonkhaliha nkumi, ni yena naahala oreerihiya elapo yovathi; Apwiya khan'hala waavahenra awananyaawe. ³ Apwiya anaahala onkhavihera moohaawani; Nhu n'naahala onkhavihera moorettani ni moovonani. ⁴ Kaahiira: Apwiya, nkoonele ekiriri! Nkivonihe, kontha kihookosserani. ⁵ Awananyaaka anaakuuluma onala, yiiraka: Ntjinanaa nin'hala orimeela wala okhwa eyaakhani? ⁶ Awaaka okiweha n'wananyaaka, yena nuulumatja tjitthu tjoohikhala; nrimeenhu onaawehaweha tjinkhalaaka, ni iirwaaka, yena nawaavaha akhwaawe makhalelwaaka. ⁷ Ahinkipheela anaathukumana ni anaakaapa; yanriihaka okikhumenla yootakhala. ⁸ Ayena aniira: Ehonkhuruwela eretta yuulupale; vano wakokhoralyaawe, khanvuwatho. ⁹ Weekhweeli, hata ninpwanaaka owanrimani, ankhuluvelaaka, tjaalyatjeehu nkhayi, hokirukunuwela. ¹⁰ Massi Nhu, Apwiya, mun'nokoonela ekiriri ni mun'nokivussa, wowiira akitikhinatje. ¹¹ Woyeeyo kinaatjuwela wiira n'naakipanka yooreera, wiira awananyaaka ahikitthematje. ¹² Mwiirutthuniwaka, mun'nokikhavihera ohoolowinhu womahuku ooteene. ¹³ Apwiya, Nluku owiisrael, attottopeliye womahuku ooteene. Amem!