¹ Kihowanriiha noovilela Apwiya; Ayena ahokiwenla ni ahiiwa okhuwelawaka. ² Ahokikumiha munlikitthini nowoopiha, nkalapoosso; aheessa enhaatjaka wamwala ni yaahovarenla meettelwaaka. ³ Ayena ahohela mwaanomwaka ntjipo nophiyaaru wiira nimwiipele Nlukweehu. Entji anaahala woona yeeyo ni anaahala Onttittimiha, ni anaahala waakhuluvela Apwiya. ⁴ Ooreerihiya ntthu naakhuluvela Apwiya ni hinaattittimiha owiitjaatta ettherema wala yaale owootha. ⁵ Apwiya, Nlukwaaka, tjintji miiriirya tjinpankeenhu; tjitthu tjin'nuupuweleleenhu tjihikhaleke tjowaalikeliya; kinaattonkelale ni kinaahimeeryatjale, yaahala okhala oovikana tjaahala ottonkiya. ⁶ N'hiweheehe okuttho wala tjoovahiya, n'hotthukula maarwaaka; khan'nokhanhenriha tjoovaha wala okuttho mwaha wotanpi. ⁷ Vano, kaahiira: Nkaweha, kiri vaa; nliivuruni yowantikhiya wohissimaaka. ⁸ Enpheelaaka ovara otthunawinhu, Nlukwaaka; Tjoorumatjinhu jiri wanrimaniwaka. ⁹ Kihokhuwela moolumo ooreera ossariyeenhu waatthuni entji; Apwiya, Nhu n'naatjuwela wiira malakwaaka khayuulumale eyo. ¹⁰ Akivithale esariyeenhu wanrimaniwaka; kihokhuwela nfentweenhu niwoopolawinhu; akivithale waatthuni entji nfentweenhu wokhweeli wala ekhweeliinhu. ¹¹ N'hikaakihere mitekotjinhu tjokiriri, Apwiya; wowiira nfentweenhu wokhweeli niikhweeliinhu kikhalane woohimala. ¹² Mikatjamiho tjintji tjinkirukureerya; tjoovaratjaka tjinaakikhaliha wahinkhwitiryaaka weenheenha; tjiri tjintji woovikana ekharari tjion'muruniwaka, ni nrimaaka onkhala woohitaphuwa. ¹³ Ntjiveliyeke, Apwiya, wookoopola; ni mwaakuve okikhavihatjera. ¹⁴ Akhale owoonihatjiya ehaaya anpheela okumiha ekumyaaka. Ahokolyee ooteene yaale anpheela okooniha oweryaa. ¹⁵ Akhale ookwanhulatjiya, niihaayatjaya, ooteene yaale ankiirela: Hopankiya ratta! Hopankiya ratta! ¹⁶ Massi atthapeke ni atteeliyeke yaale anoopheelatjani; yaale anfenta woopolawinhu yiireke woohihiyenra: Apwiya attottopeliye! ¹⁷ Kimassikhini ni oohiitthu; nan'lelo tjitjon'mo, Apwiya ankhala nimiivano. Nhu mwankhaviherwaaka, ni Nhu n'naakoopola; n'hipitjapitje, Nlukwaaka.