¹ Kiholakela: Kinaahala wiirattavenla wiira kihikhale niitanpi; kinaahala okhikitjera malakwaaka kakhala nintthu ootakhala. ² Massi, kinari oomaala, kihuulumatjale tjitthu tjooreera, ekwereryaaka yaahotepa. ³ Nrimaaka waanaapharela; weeraaka kuupuwelaka tjitthun'nha, waanaapharela phanka mooro; vano, woomaleloni, pheeraaka: ⁴ Apwiya, nkitjuwelihe nihuku noomalela ekumyaaka ni mahukwaaka; nkihimeerye ekhalelwaaka. ⁵ Kontha Nhu n'hophima mahukwaaka niiphimo tjintata; mahuku eekumyaaka etthu ohoolowinhu. Weekhweeli ntthu ri phanka ephyoo. ⁶ Khweeli, khula ntthu neetta phanka ntthuutji; ooteene anaakuvatjenra mihakhu, wanookhalaru wiira khanaatjuwela an'hala ophwanha. ⁷ Vano, Apwiya kinanriihani? Phinhu kin'wanriihani paassi. ⁸ Nkihulusse etanpitjaka tjooteene; n'hikikhalihe ttontto aatirikhi. ⁹ Kiri oomaala, akinkhwitiri otaphula malakwaaka mwaha weetthu epankaleenhu. ¹⁰ Mweemelele okittarussa, kontha kinaahukhumwiya nintataninhu. ¹¹ Mwaahukhumwaka atthu mwaha wotanpi, Nhu n'naakussa tjitthu tjinkhuluvelesaaya; kgweeli, weekhweeli atthu ooteene ari phanka ephyoo. ¹² Mwiiwe mavekelwaaka, Apwiya, ni mwiiwe okhuwelawaka! Mwiiwe wunlawaka! N;hikivirikaneele, kontha ninhu kiri phanka ntthu oohitjuwanyaa, ntthu oottayi, phanka tjaaryaaya atthwaaka okhalayi. ¹³ Mweemessere okittarussa, wowiira kaakulele othyaa kihinakhwa.