¹ Apwiya n'hikitthukele moorussiyaniwinhu, n'hikihukhumu nookassiriyawinhu. ² Kontha mattheereenhu anaakihoma ntataninhu ninkhala nimiivano. ³ Erutthwaaka yooteene eri niiretta mwaha wookassiriyawinhu; nmakhuvanimwaka khuuvo okumimwaha wotanpitjaka. ⁴ Kontha tjoovaratjaka tjinaakihuviha; tjinaakilemela tjinene. ⁵ Makhwattaaka mentji ni anaanukha mwaha watjowiiratjaka. ⁶ Kihuuluvala nooyevihiya; kinaatjukula nihuku nooteene. ⁷ Nmirimanimwaka oniira opharelaka, ni akinookumi mwiirutthuniwaka. ⁸ Kiri owuntakyaatja. Nrimaaka wookutakuthyaa onaakoopopiha. ⁹ Apwiya, n'naatjuwela tjoopheelatjaka tjowanrimani ni tjowoovatjaka khatjiri tjoovithiya wanhu. ¹⁰ Nrimaaka onaakaatta wowaakuvyaatja, ekurutjaka tjihorwaa ni woonawaka ohovukuwa. ¹¹ Assinpwanaaka naassikhwaaka ahokihuluwa mwaha womakhalelwaaka, amwaattaman'nwaaka ankikhala ottayi. ¹² Yaale anpheela okumiha ekumyaaka ahokeessenra miryankho. Ahopheela okooniha oweryaa; anuuluma moolumo ookwanhula, anuuluma moolumo owootha nihuku nooteene. ¹³ Watjooteene, kiri phanka ntthu ohiiwa ni akiniiwa etthu; kiri phanka ntthu oohuulumatja, hinuuluma etthu. ¹⁴ Kiri phanka ntthu hiniiwa ni khanaakhula. ¹⁵ Weekhweeli kinawanriihani, Apwiya; n'naahala waakhula, Apwiya Nlukwaaka. ¹⁶ Kinuumatja tjon'mo wowiira awananyaaka ahikitthapenle. N'nhaanaka natherekuwa, anaahala opanka tjitthu tjowoopiha ohoolowaka. ¹⁷ Kontha kin'hala vakaani opheela omora ni kin'noona oweryaa. ¹⁸ Kinaalaphulula tjoovaratjaka, kihaamineela etanpyaaka. ¹⁹ Massi awananyaaka ari entji; yaale ahinkipheela nssariyani ari entji. ²⁰ Ayenatja ankiliva yooreera ni yootakhala; anaakootheryatja, kinaavararu yooreera. ²¹ N'hikihiye, Apwiya; Nlukwaaka, n'hikihiye. ²² Nkikhavihatjere phiyaaru, Apwiya, moopolyaaka.