¹ N'hirussiye mwaha waatakhali; n'haaweheehe anpanka tjohissariya. ² Kontha ayenatja anaahala wuuma phanka eetthaka ni anaahla onhaala phanka miri tjikihi. ³ Mwaakhuluvele Apwiya ni npanke yooreera. Nkhale nlaponi ni mwintjenre ekhalelweenhu. ⁴ Vano, mwiivahenre waaPwiya, ni Ayena anaahala wookhaviherani tjootthuna tjowanrimaniwinhu. ⁵ Nvahenre mittalatjinhu waaPwiya; mwaakhuluvele ni Ayena anaahala owoonelani ekiriri. ⁶ Ayena anaahala othoonhera essariyaaya phanka nthuko woothana ni phanka ntjuwa noothana. ⁷ Nmaalelyeeke ohoolo waaPwiya ni mwanriiheke woovilela. N'hirussiye nintthu akhalana yooreera mwaha weetthu evaralyaawe, wala ntthu avara tjoovaratjawe tjootakhala. ⁸ N'hirussiye wala n'hikassiriye. Nhikutakuthyee; tjin'waana mikatjamiho. ⁹ Atakhali anaahala omalihatjiya, massi yaale ananriiha Apwiya anaahala ohalana elapo. ¹⁰ Owakathi vakaani, ntthu ootakhala nrima naahala orimeela, Nhu n'naahala oweha nipuronawe, massi yena nkowiira nakhumale. ¹¹ Massi owiiyeviha anaahala ohalana elapo, ni anaahala okhala ninrettele woohimala. ¹² Ntakhali naamuuluma nassariya ni nankhuura nimeenwaawe. ¹³ Apwiya ananthyaa, kontha anaaweha nihukunawe niphiyaka. ¹⁴ Atthu onpiphini aneetta niikatanatjaya ni antthonkomaniha tjitthutjaya wiira yaamorihe oohaawa ni oohikhalana, woopheela owiiva anassariya. ¹⁵ Ekatanatjaya tjin'hala waarakaliha assineene ni marekwaaya anaahala okwanhulatjiya. ¹⁶ Wooreeressa okhala nassariya nimassikhini woovirikana naananrima entji. ¹⁷ Kontha myoono tjaananrima tjinaahala okwanhulatjiya, massi Apwiya anaakhavihera anassariya. ¹⁸ Apwiya anaakhavihera atthu oophwanela, khula nihuku, ni oohalanaaya khin'malatho. ¹⁹ Ayenatja khan'hala woonihatjiya ehaaya owakathyaaya wakhala woorika. Yakhumenla etala, anaahala okhalana yoopheela olya. ²⁰ Massi atthu ootakhala anaahala orimeela. Awanani aaPwiya an'hala okhala phanka ettuva tjon'mattani; anaahala oliya ni anaahala orimeela phanka mwiissi. ²¹ Ntakhali naakopha ni khanliva, massi nassariya phonfento ni naavaha. ²² Yaale areerihiye ni Nluku anaahala ohalana elapo; yaale antakhalihiya ni Yena anaahala malihatjiya. ²³ Weetta wantthu onkhaliheriya naaPwiya, nttala onviraawe khula pinaatamu. ²⁴ Amoravale, khan'hala okokhora, kontha Apwiya ananvarenla nintatanaya. ²⁵ Kaari nanttonpe vano kihuuluvala, massi akinamoona nassariya atthawiyaka, wala assaanaawe atjukulelaka nkatthe. ²⁶ Nihuku nooteene yena phooreera ni nawaatjima, ni assaanaawe anhala okhala yooreerihiya. ²⁷ Okhalele ottayi yootakhala, ni opanke yooreera; vano, onaahala okhala woohimala. ²⁸ Kontha Apwiya anfenta essariya i khanaahiya anontthara owaamini. Ayenatja ankhala oossunkiya woohimala, massi amutji aatthu ootakhala anaahala omalihiya. ²⁹ Anassariya anaahla ohalana elapo ni anaahala okhala npakha khalayi. ³⁰ Malaku anassariya anuuluma otjuwelatja ni anawintjenra essariya. ³¹ Ekettelo yaaPwiya enkhala wanrimaniwawe; enhaatjaya khatjin'hala otherekuwa. ³² Ntakhali nanwehaweha nassariya apheelaka omwiiva. ³³ Apwiya khan'hala waahiya nmatatani mwaatakhali wala anaahala otthukeliya eerwaaka otthukeliya. ³⁴ Mwanriihe Apwiya ni nkhale munttalaniwaya, ni yena naahala woovussa wiira n'halane elapo. Onaahala woona atakhali yamalihatjiya. ³⁵ Kihomoona nlopwana ntakhali iimwaryaka phanka nri woomela, ³⁶ massi, waakulelalyaaka ovira, akaaphwanhale. Kaahopheelatja, massi khawaaphwanhiye. ³⁷ Munwehe nlopwana oophwanela nanweheeha nassariya; ehaavo yowanriiha wantthu onrettele. ³⁸ Anatanpi anaahala okwanhulatjiya; atakhali anaahala omalihatjiya. ³⁹ Woopwaa waanassariya onkhuma waaPwiya; Ayena anawaakhavihera mahuku omahuviho. ⁴⁰ Apwiya anawaakhavihera ni anawoopola. Ayena anawoopola mwaatthu ootakhala ni nawoopola kontha anantthawenla.